2024-08-27 17:21:23

蘇皓兒拍《同居少女諸事卜》顛覆女神形象鄧月平演同性親密鏡頭面紅耳熱

雲浩影（Cloud）、吳家忻（kayan9896）、蘇皓兒（Chloe）主演的Viu Original本地原創劇《同居少女諸事卜》，正於「黃Viu煲劇平台」播出，逢星期三、四中午12時有新集數上架。《同居少女諸事卜》講述三位性格不同的女生，於同一屋簷下生活，一邊尋找愛情真諦，一邊探索自我和人生的多樣性，尋找女性真正的需求。當中Chloe在劇中不僅飾演舉止粗魯的角色，更與鄧月平發生同性曖昧關係，絕對顛覆現實的女神形象。

Chloe在《同居少女諸事卜》與鄧月平關係曖昧，二人不乏粉紅抱抱、面貼面等親密鏡頭，當中一幕Chloe在球場酒醉，繼而跟鄧月平深情近距離互望的戲份，氣氛浪漫。拍攝期間，二人亦笑言拍到面紅耳熱，有點尷尬，Chloe表示：「其實圍讀劇本時都有啲面紅，雖然我之前都有拍過同女仔親密戲，但今次呢個真係好浪漫，醉酒面對面望住對方，有面紅耳熱心動感覺，加上阿平好靚，我本身都好鍾意欣賞女仔，所以出嚟感覺好浪漫，成個畫面好唯美，好有日系或韓劇感覺。」

初嘗演較「Man」角色的鄧月平，指自己平時外表雖然女性化，但實際性格屬於「男人底」，所以未有太大難度，還笑言終於可以發揮自己真實性格：「今次係我第二次同女仔親密鏡頭，不過今次較大挑戰係Chloe比較高，但我角色嘅氣場要高過佢，所以我盡量調節自己，令自己高度唔高，但氣場要高。」未知現實生活中，二人可曾被同性追求？鄧月平坦言試過：「我有個由中一到而家都感情要好嘅朋友，我到今時今日都話對方中學時鍾意過我，但佢死口唔認，點解我覺得佢鍾意我？當年佢送咗隻公仔畀我，然後眼甘甘望住我、想同我表白。」Chloe就自爆讀書時比較「摺」，莫說是女仔，就連男仔追求者都不多。

蘇皓兒打籃球有壓力

《同居少女諸事卜》劇中亦有二人打籃球戲份，對於現實中熱愛籃球的Chloe沒有違和感覺，Chloe表示：「每次工作要打籃球都有少少壓力，近排開工較密，少練波，所以拍攝打籃球時有啲緊張，希望出嚟效果好，相信自己有少少功架喺度。」至於鄧月平自言完全不懂打籃球，接到劇本知道自己要打籃球，才匆匆買籃球回家學打。