![譚玉瑛與朱茵曾一齊拍《閃電傳真機》。](https://cdn.am730.com.hk/s3fs-public/styles/article_image/public/2024-08/ENT_45.jpg?itok=erKL9x6J)
譚玉瑛與朱茵曾一齊拍《閃電傳真機》。
朱茵、潘燦良和導演劉偉恒昨日 (7日) 到新城廣播接受譚玉瑛(阿譚)、何基佑及黃筠兒主持的《QK玉瑛室》訪問,朱茵和阿譚兩位昔日兒童節目《閃電傳真機》主持甫見面即熱情打招呼,阿譚更透露:「自從佢生咗囡囡之後就冇再見過佢。」而何基佑見到女神朱茵即化身小粉絲,主動遞上一張燙金Yes卡給女神簽名,事後還甜絲絲合照,他開心表示:「呢張卡真係要好好保存。」
![何基佑(左)變身小粉絲要求朱茵簽Yes卡。](https://cdn.am730.com.hk/s3fs-public/styles/article_image/public/2024-08/2.%20%E4%BD%95%E5%9F%BA%E4%BD%91%28%E5%B7%A6%29%E8%AE%8A%E8%BA%AB%E5%B0%8F%E7%B2%89%E7%B5%B2%E8%A6%81%E6%B1%82%E6%9C%B1%E8%8C%B5%E7%B0%BDYes%E5%8D%A1%20%281%29.jpg?itok=uOlToKFO)
何基佑(左)變身小粉絲要求朱茵簽Yes卡。
朱茵是90年代女神,當年她一邊修讀演藝學院,一邊返無綫拍攝兒童節目,她指當年半工讀是她人生一段最辛苦的日子,「因為兩邊走,學校有習作,又要返無綫拍兒童節目,同學之間好難明我點解要拍戲,但我逢一至五返學,周六日先拍到節目。」阿譚大爆當時同事都有微言:「對我哋呢啲返工嘅人來講,你點解咁有優待,唔使返外景。」
![(左起)黃筠兒、譚玉瑛、朱茵、潘燦良、何基佑。](https://cdn.am730.com.hk/s3fs-public/styles/article_image/public/2024-08/1.%20%E5%B7%A6%E8%B5%B7_%E9%BB%83%E7%AD%A0%E5%85%92%E3%80%81%E8%AD%9A%E7%8E%89%E7%91%9B%E3%80%81%E6%9C%B1%E8%8C%B5%E3%80%81%E6%BD%98%E7%87%A6%E8%89%AF%E3%80%81%E4%BD%95%E5%9F%BA%E4%BD%91.jpg?itok=38XJy8mW)
(左起)黃筠兒、譚玉瑛、朱茵、潘燦良、何基佑。
問朱茵當時為何會拍兒童節目?她笑言也不知道,「嗰時無綫、亞視都入過學校揀啲啱佢哋節目的人,我係被揀選其中一個,但我只能夠拍兒童節目,仲記得我張合約係King Sir(鍾景輝)幫我簽,拍到後尾半年就快畢業,我就同無綫講我要返去畢業,因為我要攞到張畢業證書。」身旁的阿譚又爆朱茵當年拍節目會追問她收工時間,「佢都好抓緊時間,成日盤算幾時收工,但我又計得好準。」女神追問收工時間全因要同時照顧學業,被讚勤奮。
![朱茵當年要學業事業兩兼顧,所以非常著緊收工時間。](https://cdn.am730.com.hk/s3fs-public/styles/article_image/public/2024-08/6.%E6%9C%B1%E8%8C%B5.jpg?itok=0VcDwVXw)
朱茵當年要學業事業兩兼顧,所以非常著緊收工時間。
阿譚形容朱茵說話清晰不會轉彎抹角,朱茵則稱讚阿譚是元老級兒童節目主持,並跟阿譚說:「由我細個睇妳,到我入行同妳一齊做節目,喺妳身邊學到好多嘢,妳係靈魂人物,講嘅嘢就係。」
朱茵和潘燦良在劉偉恒導演的新劇中跟小朋友有大量對手戲,潘燦良更會由一位「虎爸」變成暖男爸爸,而朱茵則飾演一名嚴肅的小學老師,與同住胞妹經常起爭執。提到相隔十多年再度拍劇,朱茵直言不感到吃力,「因為自己鍾意,同一班同聲同氣嘅人一齊做嘢好開心,而且香港製作真係好快手,我哋都冇乜甩過,係一個好好體驗,未來日子都好期待好劇本、好角色。」
![朱茵、潘燦良](https://cdn.am730.com.hk/s3fs-public/styles/article_image/public/2024-08/4.%E6%9C%B1%E8%8C%B5%E3%80%81%E6%BD%98%E7%87%A6%E8%89%AF.jpg?itok=FBMO7AIw)
朱茵、潘燦良