2024-08-09 23:00:55

56歲周慧敏開騷歌衫受阻滯自爆是黃劍文幕後軍師

現年56歲的「玉女掌門人」周慧敏(Vivian) 相隔7年再舉行世界巡迴演唱會，並於8月31日假澳門倫敦人舉行《地老天荒愛一場》，日前她接受無綫娛樂台訪問，除透露預訂的歌衫受到阻滯，更自爆原來是《中年好聲音2》黃劍文的幕後軍師。

Vivian表示透過一間專賣表演時裝服的網站，預訂今次演唱會的歌衫，本來是1至2星期就送到，但現在變了12個星期才能送達，Vivian坦言非常擔心：「如果咁計12個星期應該送唔到，唔知邊一場先會到，或者會唔會到呢，呢個係一個謎( 主持：使唔使報《東張》？）我而家唔理佢幾時啦，希望佢可以到。其實衫係咪真係咁重要，啲人係嚟睇我，所以唔緊要啦，我都豁出去。」

其後，Vivian自爆有睇晒《中年好聲音2》，原來她是黃劍文的幕後軍師，並謂劍文是她的弟兄，所以在劍文的整個比賽過程，她感覺自己也是團隊之一：「一齊去揀歌，或者建議一啲唱法，陪佢一齊渡過成個過程，我覺得自己都有份比賽咁。」而向來有「玉女掌門人」之稱的Vivian，不時被大讚保養得宜，對於歲月的改變， Vivian坦言：「真係平常心，就算人哋話我好老都唔緊要，如果大家覺得我係keep得後生，可能真係福氣或者天生。每個人都會變老，或者有皺紋、肌肉唔夠緊，我好接受自然優雅地老去。」