何君堯指露宿者影響市容 「中環包到自己似裹蒸糉」 卓永興：係人嚟驅趕意義不大

今日(10日)立法會大會上談及市容問題，選委界何君堯問及如何處理露宿者問題，指露宿者影響市容，亦擔心「露宿者朋友」的健康及衞生問題，他指偶爾發現「連中環入面都有(露宿者)，包到好似裹蒸糉咁，攤晒喺人來人往嘅地方」，問政府如何處理。

透過政策整頓不現實  需人性化處理

政務司副司長卓永興回應時強調，露宿者並非純粹環境衞生問題，「露宿者係人嚟」，指採取聯合行動進行驅趕「唔難做㗎呢方面」，但不想「你喺油麻地驅趕佢，佢去咗大角咀；你去大角咀驅趕佢，佢又走返去旺角」，認為意義不大，卓永興重申當局會按個案處理，及由多個部門參與，如尋找社署向他們了解情況，如協助提供臨時地方作安頓、及尋找工作等，若最終發展至十分影響城市面貌，「經一輪勸喻我哋都係要處理，但唔係話一刀切」，他強調，如只透過政策作整頓是不現實，當局需在平衡市容、人性化地處理露宿者。