李麗珊為HOY TV擔任評述備受讚賞
今屆香港隊喺奧運收獲2面金牌，而喺1996年亞特蘭大奧運為香港取得首面奧運金牌嘅李麗珊，今屆為HOY TV擔任評述。運動員出身嘅珊珊賽前幾個月做足功課，識得喺適當時間發言，江旻憓奪金後向觀眾提到，無論係江旻憓定係無緣進入決賽嘅「跳馬王子」石偉雄都值得敬重同支持，獲網民大讚。
對運動員有同理心，絕對因為珊珊多年艱苦訓練經歷，深明比賽背後嘅付出。李麗珊早前受訪就提及，2002年10月參與南韓釜山亞運力求衛冕女子滑浪風帆金牌嘅一戰，原來係冒死而戰！
證實患上膽管炎
李麗珊憶述參與釜山亞運前已經腹痛難當，不論係隊醫、教練以至當時隊友、現時老公嘅黃德森，都問珊珊係咪要撐落去﹐因為一旦比賽期間有咩事暈咗跌落海，身邊冇人可以立即拯救，隨時浸死！
但李麗珊認為亞運奪金係夢想，冇可能訓練咗咁多年先嚟放棄，於是忍痛作賽，最終更順利奪金。不過李麗珊頂到最後終於捱唔住，要由教練船送上岸再提早返港就醫，所以連獎牌都冇拎。根據當年報道，珊珊經診確後證實患上膽管炎，其痛楚可想而知。
用露營爐具煮飯食
忍得痛仲要捱凍，當年香港運動員資助唔多，李麗珊1990年參加歐洲巡迴賽兼集訓，但因為冇乜經費，教練同珊珊一行4人去到最尾要喺比利時瞓沙灘，用露營爐具煮飯食，但係一覺醒來爐具被人偷埋！
李麗珊一行人唯有幫襯中餐館，厚住面皮同老闆講收平啲，老闆答應之餘仲煲湯俾佢地飲，走嗰陣仲攬住喊。李麗珊話當時大家都係拎住積蓄出發，珊珊本身家境清貧，好在有舅父資助，佢亦好感恩家中十兄弟姊妹幫手頂住頭家等佢可以追夢。
原文刊登於 Yahoo 娛樂圈
登革熱｜症狀、傳播途徑、避免蚊子叮咬、預防方法。（衞生署衞生防護中心FB）
amJetso送 Bodysonic先力牌窗口式冷氣機X靜音循環風扇X電動冷凍小風扇
