有報道指，因為有MIRROR坐鎮，Viu成功奪得旅發局西九倒數騷主辦權。對家大台不敢怠慢，正籌備在對岸中環搞另一個更大型的倒數騷對撼，並找到久休兩年的古巨基復出。其他同在邀請名單的歌手，包容張學友、陳奕迅、譚詠麟、郭富城、容祖兒等等，形成一場非常明顯的新舊對決，像八十年代九十年代千禧年代的《勁歌金曲》大戰《全民造星》。
不敢預測最終誰勝誰負。MIRROR係好紅，但懷緬美好舊香港也是主流喜好。何況，大台還有一眾自家青訓產品，例如炎明熹，據說也不是不受歡迎，隨時連年輕一代的觀眾也吸納得到。不過，身處公司股價插水的高壓之下，這場榮辱之戰，似乎更加不容有失。我就建議新上任的高層們，要試試think outside the box，你有李克勤有周慧敏，唔係話唔好，衰在見慣見熟，沒有新鮮感。我有以下推介，找到他們出手的話，肯定對節目話題性帶來極大幫助。
❶ 林家謙。或者，你會話，林家謙係現今最紅男歌手之一，首首歌也大熱，鬼唔知搵到林家謙會吸引到觀眾？無人諗過找林家謙原來可以請埋譚仔女聲合唱團嘛。林家謙試過在台上齋彈琴不唱歌，試想像，由譚仔女聲合唱團獻唱《一人之境》、《難道喜歡處女座》，齋幻想也開心。嫌未夠辣，可以請埋陳輝陽與女聲合唱齊齊crossover。兩支女團擦出的火花，勁過放煙花。
❷ 農夫。身為大台高層及當家小生，無理由請唔郁農夫上台。尤其二人先前預告明年三月將會推出新歌，提前少少當做做熱身，雙贏。不過，不要再找麥玲玲合唱《風生水起》了，太理所當然，又不是年三十晚行花市。可以唱《返老還童》吖，「幾時開始發現自己已經成熟，就係你發現接受到老細嘅凌辱，無論政局幾動盪，你會選擇退縮，其餘乜都唔驚，你剩係最驚稅局。幾時先發現自己做咗大人，就係做錯啲乜嘢事，你第一時間賴人，你無做到個壞人，但係做咗你細個最唔想成為嘅嗰種大人。」
❸ 黃明志。係，我知道《玻璃心》好紅，網上點擊數字超過三千萬次，不過，恐怕無電視台敢播。黃明志還有其他歌曲嘛，例如最新一首《牆外》，歌曲是台灣城市金門的廣告歌，MV拍到金門異常吸引，對招徠旅客肯定大有貢獻。應該要請他為中環海濱即添馬一帶寫返首歌啦。怕只怕，黃明志賣NFT賣到一夜致富，點請得起？
❹ MC $oHo & KidNey。不用多說，本年度金曲中的金曲，就算不關心廣東流行曲，也肯定識得哼兩句的《係咁先啦》。如果找到兩位主唱者加埋Kayan9896，唱住「來讓我跟你走，回程順路八折可享有……」來倒數十九八七六五四三二一，唔哄動？
❺ 何韻詩。最近，何韻詩執屋，清走無數昔日在樂壇頒獎禮獲得的獎座，當中，包括大台頒發的。大台向來被形容為超級小器，不過，連向來仇口非常深的梁思浩也能夠回歸，真係甚麼事也有可能發生。最近《梅艷芳》大熱，如果請到何韻詩獻唱師傅的一首首金曲，肯定可以刺激無數香港人的淚腺。
❻ 鄭中基。俾個機會大家在電視節目聽返一次有「戒煙」的《無賴》。