![傻粉發現案](https://cdn.am730.com.hk/s3fs-public/styles/article_image/public/2024-08/60-01.jpg?itok=h23HOHf1)
傻粉發現案
如果你話韓流在港影響力不及以前犀利,我絕對不認同,至少每逢韓星來港開騷或者搞見面會,照樣都吸引到大批粉絲買飛追星。就好似亞洲天王Rain開個唱,MIRROR成員Stanley、ERROR的肥仔都有入場;又好似憑《背著善宰跑》突然爆紅的邊佑錫,在亞博舉行的亞洲巡迴見面會香港站門票,一開售就極速被掃清,見面會前一日搞的銅鑼灣記者會亦逼爆商場,風頭可謂一時無兩。
記者會當日,真是「賓虛咁嘅場面」,邊佑錫一出場即引爆數千人粉絲的歡呼尖叫聲,之後他更相當識做勁派心心、飛吻,搞到現場觀眾暈得一陣陣。不過,有人睇得開心過癮,有人就覺得嬲到噴火,碌Threads時見到有不少粉絲炮轟這次商場記者會,先鬧坐第一排竟然不是到場採訪的記者,而是「大劉」劉鑾雄女兒劉秀樺、邱淑貞大女沈月以及視后唐詩詠,是「名媛見面會」、「自肥記者會」。再鬧有人疑似逼他出席飯局應酬,仲鬧埋第一行有位戴口罩的女士,趁邊佑錫不為意,偷偷出手摸他的背脊,得逞之後仲狀甚興奮。
見到類似留言,真心「當堂嚇一跳,然後得啖笑」,心諗要不是劉秀樺鍾意追韓星,相信好多人連邊佑錫的褲邊都未必睇到。這裡不是說千金小姐派小甜頭,窮等人家應當感激流涕,要三跪九叩道謝大恩大德,而是想說自從有「商場一姐」之稱的新地馮秀炎升職做執董之後,韓星做嘉賓的商場騷確是買少見少(以前觀塘apm好多韓星活動!),難得皇室堡仍肯「課金」,讓未必買到飛入場睇騷的大家,可以多個免費機會見偶像,真是要且看且珍惜。
最好笑的是鬧劉秀樺等人坐頭排,其實只要有心找找資料,自然就會發現皇室堡和皇室大廈的業權,早已由「大劉」妻子「甘比」陳凱韻,以信託人身份代未成年子持有,簡單講便是劉秀樺是商場其中一位老闆,做老闆都不可以做VIP坐頭排近距離睇明星?甚麼世界?當然都有一些活動是記者坐頭排,但記者不一定會覺得頭排是最佳位置,始終太近影相難就角度,對於他們來說,會場後方設高台更加方便。至於飯局應酬之說,我不敢說肯定沒有,就算有,你又怎能肯定餐飯他食咗都背脊骨落?捱足9年難得爆紅,同有錢人見個面傾一下合作機會,也是win-win雙贏。
所以說,做人可以天真,但不可以太天真,如果對事物完全不認識,又要大放厥詞,真是會貽笑大方,好在這些「傻人發現案」在Threads裡面比比皆是,被人笑到面黃都是一時三刻的事,過幾日又有其他人取代你位置。
啊,差點忘記提那位「抽水阿姐」,我沒有太多話可以說,因為她是真心抵鬧。