Susan Sarandon及Jessica Lange重演兩位一代女星Bette Davis和Joan Crawford恩怨情仇。
現在是電視黃金時代，差不多每月都好多新劇推出，雖然追得好吃力，本住有殺錯無放過心態，基本上至少要看過一兩集才可判斷「煲劇」值，仲有一大咋4月回歸，我有個電視精朋友，他比我更配得上「美劇狂人」這個稱號，為了清劇有時要開2X速度快進，唔通我都要步佢後塵？！
文：Carman Chan
得：《Feud: Bette and Joan》
呢期新劇當中最promising的都歸FX旗下，《Feud》首播集Jessica Lange和Susan Sarandon一對戲就火花四濺，看得人興奮莫名；電影《La La Land》藉年輕人追夢帶觀眾緬懷荷李活昔日風華，《Feud》卻是一開始已日暮西山，兩位一代傳奇女星Joan Crawford和Bette Davis年華老去，為了抓住餘暉，不咬弦也要走在一起，成就這套戲裡戲外的《蘭閨驚變》(What Ever Happened to Baby Jane?)。看過showrunner Ryan Murphy訪問，大意是說，這段荷李活史上最著名的恩怨情仇，到底當中有幾分真幾分假，還重要嗎？
睇製作水平、睇演技，「煲劇」值滿分，雖然我對兩位女星的戲不熟，Bette Davis看得比較多，至少她的《All About Eve》係經典，我係小影迷都看過，所以看見Lange及Sarandon的造型沒十足都有九成，已經看得很興奮；神態捕捉方面，覺得Sarandon比較不太著力的演繹好鬼神似，酷到一個點像Bette翻生，看得我樂不可支，第一集就全盤收貨，希望劇組別搞砸就好。FX另一重頭《Legion》雖然比較慢熱，但美指及敘事手法都走偏，keep得住觀眾保持觀望未走失。個個都話《Logan》好睇，但個人對X-Men Universe中最無感的角色就是狼人，眾多超能力中最叫人目炫神迷的，梗係控制別人心智的能力，所以對《Legion》仍然抱有超級期望。
唔得：《Big Little Lies》
反而HBO大卡士孭重飛的《Big Little Lies》，有點意外不符預期，雖然製作精美，我沒看過原著小說，不知是小說本來的人物心理狀態原本就是這樣，成班女人心計甚重，拗撬又petty又trivial，尤其是Laura Dern演的PayPal高層這個角色，事業型母親本應日理萬機無暇著眼斗零濕碎嘢，但她心眼細到暈，跟全職主婦的Reese Witherspoon鬥法竟也佔不到一點便宜，若果職場勝利組都係如此水平，難怪要為這些大型企業擔心。
Nicole Kidman的家暴情節又作狀到死，打者愛也事實上也是陳腔濫調，家暴後的anger sex情節，有點為吸睛而做好唔自然，一路睇一路越覺得自己睇緊鬼佬版TBB大台爛劇，就算兩位星級女星坐鎮，都無法將原來soap味甚重的劇本昇華，除非設定的謀殺案情峰迴路轉，否則都幾難返魂有術。同是女人戲，《Feud》的境界似乎高一籌，我就忍你睇晒一季才蓋棺未遲。
