快閃首爾 直擊劉俊謙
自製驛馬星動，今年認真飛得相當密，純粹旅行或專誠睇騷，短短一個暑假，經已紐約、台北、曼谷飛了三轉。依然有點意猶未盡，剛好「飛雲」來到，機票價錢也算合理，剛剛過去的周末長假又再次出發，飛到首爾去。並非基於Netflix電視節目《黑白大廚：料理階級大戰》熱播想湊熱鬧，走去幫襯那些參加者擔任主廚甚至是當老闆的人氣餐廳(根本是不可能的任務吧)，只為再一次親身看到「韓劇歌王」K.Will在台上唱歌，聽他演繹經典《Please Don’t...》和新作《沒有適合我的離別歌》，以及探望定居當地的朋友，順道拍些現場直擊的短片。
緣分有時候就是那樣奇妙，足足八年沒有踏足首爾，碰巧就在舊地重遊的這幾天，劉俊謙也在那邊快閃三日兩夜，出席運動品牌lululemon於當地舉辦的「Together we grow」活動(所以才有那張與品牌大使朴敘俊的合照)和參與10月16日在韓國上映的《九龍城寨之圍城》(簡稱《九龍城寨》)宣傳活動。
出發前幾日，身在首爾的朋友M告知這則10月12日的「香港星蹤」，問我是否有興趣：「10月4號賣飛，你仲有一星期時間諗諗，當體驗下韓國謝票。」身為「100%劉謙忠粉」，興趣絕對有，但「扑槌」前還是有點猶豫，一來自己病了很久「咳唔停」，不確定當天的身體狀況是否「頂得順」；二來朋友M說的「要參加Q&A環節就要睇埋套戲」這句話也令我思考了一會。畢竟《九龍城寨》在香港看過兩次了，擔心「三刷」熟知劇情加上舟車勞頓會忍不住睇戲中途搵周公，結果考慮了幾天，最終決定去馬，因為我想現場見證「劉謙」衝出香港，殺入韓國！
這個附設答問環節的謝票場於首爾蠶室的LOTTE CINEMA舉行，入場前瞥見放映室門口張貼的宣傳海報，發現原來《九龍城寨》的韓文戲名，不是從中文直譯過來；原版有七個字，來到韓國變成八個字，叫做《구룡성채: 무법지대》，再翻譯成中文，意思就是《九龍城寨：無法地帶》，相比多了一重喻意的原裝戲名，後者語義上更為直白，貼近昔日對這個三不管地帶的描述。
電影放映方面，在韓國播放的雖然跟香港一樣都是廣東話版本，但只有韓文字幕，部分情節聽得不太清楚，要自己腦補、斷估那些角色在說些甚麼。可能是人在異鄉的關係吧，「三刷」《九龍城寨》不僅不覺悶，反而那些熟悉的面孔、對白、聲音和畫面，令人愈看愈感動之餘亦與有榮焉。始終香港電影輝煌不再乃鐵一般的事實，能夠有齣票房過億的作品在海外放映，吸引當地戲迷買票入場分外難得。
映後分享環節全長一小時，由韓國電影雜誌《Cine21》(씨네21)編輯長(香港稱為總編輯)、熱愛香港電影的韓國電影評論家朱晟徹(주성철)擔任主持，「信一Oppa」在翻譯的陪同下以類似戲中的「打呔Look」亮相。期間他分享了很多以往從未聽聞的幕後花絮，篇幅所限，只能夠提到以下兩個部份。
試鏡時，「劉謙」說導演鄭保瑞要求他演繹經典電影《教父》(The Godfather/1972)其中兩幕戲，「好記得佢哋(劇組)無啦啦send咗《教父》嘅劇本俾我，咁我就心諗關咩事啊，點解會(用)《教父》嘅呢無啦啦。但係唔理啦，照樣準備啦，睇咗段戲，有兩段戲嘅，有一段就係Al Pacino(阿爾柏仙奴)喺個婚禮上同一個女人嘅對話啦，另一段戲就係同佢啲兄弟講關於一啲家族嘅事情，跟住我諗我大概背好晒(對白)之後就去casting。」
「但係去到casting好得意，因為有副導演喺度啦，鄭保瑞導演喺度啦……我記得，cast咗差唔多成個幾兩個鐘，去到一個位係，好似唔係淨係casting，佢哋不斷話：『阿謙，你試下另一種做法』、『啊，你又試下咁(演)啊』其實大家好似喺度排練緊。嗰陣時其實……因為我又唔係好知道佢哋拍呢個故事係咩，佢哋好興唔講㗎，鄭保瑞導演係，佢嘅特性嚟㗎，所以casting嘅時候，心情都幾輕鬆㗎，會覺得：『盡力囉！得就得，唔得都冇所謂啦！』好感恩最後就得咗(得到角色)。」
「劉謙」又分享與古天樂拍攝那幕「龍捲風拉閘救四少」重頭戲的經歷：「拍之前啦，古生就無啦啦走埋我身邊，咁就用一隻紙杯裝咗啲嘢，咁我望下係咩啦：『咦，酒嚟㗎喎！Whisky喎！』佢就(示意)：『飲咗佢啦！』然之後唔出聲就走咗喇。事後我就諗返，其實嗰刻好溫暖嘅，因為面對啲情感好重嘅戲呢，佢覺得有時候酒精真係可以幫人哋放鬆少少，可以自由啲咁樣表演……適量嘅酒精(全場大笑)。」
「跟住到拍嘅時候啦，拍佢同拍我嗰邊其實係分開拍嘅，拍完佢嗰邊，(輪到)拍我嗰邊呢，古生又粒聲唔出坐低咗喺個木箱上面望住我，其實個鏡頭淨係拍緊我嗰邊，拍唔到佢㗎，佢係將頭先拍佢嗰邊嘅所有嘅情感啊、狀態啊，嗰個濃度係100%俾晒我，嗰刻我會覺得好似無啦啦同套戲突然之間好夾啊，裏面嗰種父子情、兄弟情，男人嘅情感啊，同現實中古生點樣對我，其實近乎係一樣。」