賀歲好選擇
新正頭，最好的娛樂消遣就是入戲院睇賀歲片，每人奉獻百幾蚊，換來個幾兩個鐘的緊張興奮，相當抵玩，仲可以促進經濟推高GDP，一舉兩得。今年上畫的賀歲港產片有三套，《飯戲攻心2》、《盜月者》和《臨時劫案》，套套都各有特色。
先講陳詠燊執導的《飯戲攻心2》，雖無前作靈魂人物黃子華坐鎮，亦有故事節奏拖沓譖氣等問題，但張繼聰、鄧麗欣等大部分演員都能夠交出滿分演出，絕不欺場。而且比起搞笑(有些明顯想擠觀眾笑的場口實在未如人意)，整套電影予人的感覺更感動，一場反枱六國大封相戲份，一句「唔緊要啦，再嚟過囉，仲有好多人喺度」，道盡所有「留下來的人」心情，令電影本身是否更勝從前，再非最大重點。
再講袁劍偉執導的《盜月者》。電影以天團MIRROR上弦成員姜濤、Anson Lo和Edan作招徠，擺明食住「鏡仔經濟學」條水，但事實不止於此。故事改編自2010年郵袋搶劫案，過程曲折離奇，其中的爆牆偷錶高潮位，更是不禁令人睇到屏息靜氣！當然，要挑剔還是有地方挑剔，例如姜濤未夠火候的演技(配合角色人設，這份尷尬竟變得非常合理，認真巧妙)，但仍然瑕不掩瑜，值得一睇。
至於麥啟光執導的《臨時劫案》，絕對是三者之中的黑馬，笑位流暢不突兀，有種塔倫天奴或高安兄弟的黑色幽默感覺。當然最正是演哨牙大賊的郭富城，齋講造形已經過癮到無以復加，加上對白搞鬼至極，令人輕易染上「模仿癮」！這個在過往其他影視作品中看不到的郭富城，絕對是入場最大動力。
仍然揀不落手？想慳戲飛錢？開Netflix、Disney+重溫昔日賀歲片吧！《嚦咕嚦咕新年財》、《行運超人》、《行運一條龍》、《家有囍事》等經典作品絕對值得睇再睇。但當你句句對白都倒背如流時，一切都純粹是睇氣氛，少了一些驚喜和衝擊。
溫故不如知新，既然要睇就好應該試試新事物，個人極力推介崔宇植和孫錫久主演的Netflix韓劇《殺人者的難堪》，劇集在年三十晚(9/2)全球上架，無可否認是另類賀歲劇(韓國也過農曆新年)，明祝你新一年大殺三方！故事講述崔宇植飾演的大學生機緣巧合下成為了連環殺人犯，所有罪證都消失得無影無蹤未算最古怪，所有受害者都是逍遙法外之罪犯更是離奇，但孫錫久飾演的刑警依然憑直覺鎖定了他，繼而展開了一場鬥智鬥力再鬥運的追捕。最後結局情理之內，意料之外，為免劇透太多，這裡只能夠透露「正義」必勝。
新一年，有得贏，畫面又紅紅火火(劇集不乏流血、爆炸畫面)，夠好意頭吧！