記得上屆《香港小姐》三甲是誰嗎？其實選嚟做咩呢。
試當真《校花校草》選舉，參賽者質素奇高。
無綫(TVB)《2022香港小姐》總決賽將於9月25日在紅館舉行，撞正香港開電視水著選美《Summer Girls 2022》首播日，而這段期間亦有兩大選美節目正在進行，TVB要贏，sorry，真係好難。
上個月曾經在本欄提到，今時今日的《香港小姐》已經不能與當年盛世輝煌相提並論，既未能製造話題，人人懶得講、懶得研究，選出來的佳麗又好多時不是土生土長，連廣東話都未必識講，好難代表到香港，所以「摺咗」也不會有太多人覺得可惜。當然，大台從來不會理它眼中的「非主流意見」，你有你唱淡，它有它繼續搞，反正你有沒有笑，笑得多大聲，它也不會少多一忽肉，總之這個一年一度的大騷無論如何都要搞得成，就算只得一個觀眾都要播。The show must go on，要的就是它的口號「時代在變 美麗不變」，但它明顯沒有考慮到只要不跟時代轉變，好快就連「隔籬台」的車尾燈都睇不到。
TVB抄不到的騎呢
先講ViuTV的《尾二一屆口罩小姐》，節目作為《最後一屆口罩小姐》續作，繼續有搞笑組合ERROR主持，上星期五剛好播完5集，去到51強爭入廿強的階段，一班囡囡在安排下參加「部位比賽」，要拎出肚臍、腳趾、後頸等身體部位，與其他參賽者鬥靚。的確，將女性「斬件」向觀眾呈現有物化女性之嫌，未必令女權主義者睇得舒服，但這種男性凝視又明目張膽得過分，又似是用誇張、嘲諷手法凸顯父權社會問題，以反操作招數去力撐女權。當然，撇開這個意識形態上的爭議，《口罩小姐》確實令觀眾笑得出，特別是之前80強海選爭入50強時，眾佳麗奇招盡出，最令人印象深刻的莫過於55歲的76號「胸鼓」演出，古怪到極致，而這種騎呢是TVB永遠抄不到、學不來。
試當真《校花校草》質素最高
至於由試當真主辦的《校花校草The Next Era 2022》，復刻了當年Yes！的經典傑作，開宗名義專揀高質學生妹、學生哥，一畢業離開校園就不能參加，擺明唔摻「老人家」玩，一班參賽者青春可人，特別是Shadow(王紫影)、Angelina(趙君瑜)，靚到無以復加，齋講樣貌肯定拋離今屆所有港姐候選佳麗，而且賽制更是不涉任何評判分數的100％全民投票，真真正正做到公平公正公開。當然，講起揀外在條件不得不提香港開電視的《Summer Girls 2022》，15位參賽者水着亮相，當中更有不少出名身材好的「IG女神」，養眼過港姐多多聲。
當然，大台有大台的包袱，搞選美不能「自貶身價」、「降格」，既不能攞正牌賣騎呢搞笑，亦不可以公然sell鹹濕，只可以在所謂傳統選美框框中發揮。早幾日TVB總經理(商務營運)蕭世和，突然在社交平台爆今屆港姐不但有霍啟剛做評判，更有候選佳麗著國服環節，其實TVB好應該在這個方面去到極致，既然公司發展方向都揀與內地接軌，何不「發大嚟搞」擁抱內地市場，取消香港身份證、護照限制，將《香港小姐》競選變成《大灣區小姐》競選甚至《中華人民共和國小姐》競選？TVB要救本地傳統選美就得這一招了！