照片由香港戲劇協會提供
就算再忙，有些事情就是不能錯過，譬如年度本地劇壇盛事「香港舞台劇獎頒獎禮」。
當年因為身邊一位大學畢業後才認識的BFF兼「梁祖堯超級粉絲」的極度強烈推介下，跟她一起到葵青劇院演藝廳觀賞W創作社製作的《戀愛總是平靜地意外身亡》(黃智龍自編自導，2009年首演)──演唱會看過不少，真金白銀買飛入場睇舞台劇確是自出娘胎後的第一次，能夠如此近距離目擊演員置身於角色之中，說出編劇絞盡腦汁寫出來的對白，加上布景和燈光不斷轉動，作為一個素來只會追劇和睇戲的觀眾來說，衝擊實在很大：原來戲劇可以咁樣玩！新奇驚喜之餘，又同時覺得身處劇場的世界裏，有一種說不出的舒坦和自在，就是這樣，我「入坑」了。
2010年初轉職至《蘋果副刊》擔任文化版記者(那時還未叫《果籽》)後，很快已獲編輯安排訪問舞台劇演員，而第一批「幸運兒」就是「風車草劇團」的梁祖堯、邵美君與湯駿業。彼時他們宣傳的演出《小心！枕頭人》，劇本翻譯自電影《伊尼舍林的女妖》(The Banshees of Inisherin/2022)導演馬田麥當奴(Martin McDonagh)創作、2003年在英國公演的舞台劇《The Pillowman》。
基於個人興趣和工作需要，從那時開始，與本地劇場界接觸的機會愈來愈多，人脈網絡亦愈來愈闊，因此出席「香港舞台劇獎頒獎禮」稱得上是很順理成章的事。數數手指，轉眼間已10年了，過去3,650日，有幸一直見證這個頒獎禮愈來愈有規模，亦愈來愈見格調，感覺就是，哪怕世界怎變，現實怎壞，劇壇中人依然努力捍衛香港人熟悉的核心價值：珍惜自由、尊重創作、堅守善良。無論是兩位主持(王耀祖、陸昕)的講稿、與頒獎嘉賓的chit-chat和提問、嘉賓陣容和配搭，以及得獎者的台上致辭，都有種「呢啲嘢好耐冇聽過冇見過」、「呢啲嘢係咪已經喺香港消失咗」的感覺，尤其見到資深記者「阿包」蔡玉玲和知名政治漫畫家尊子分別擔任最佳劇本和最佳導演(喜劇/鬧劇)的頒獎嘉賓，就更加令人嘩一聲。加上劇壇中人向來「有嗰句講嗰句」，現場氣氛絕佳，於亂世裏看到這些畫面倍感親切，令人禁不住一邊拍手尖叫，一邊眼濕濕。
因為沒有電視現場直播或錄──可到香港戲劇協會的YouTube頻道足本重溫──很多台上精彩發言都無法透過大氣電波傳遍港九新界，惟有借助本欄，將以下三段最使我觸動的記錄下來：
莊梅岩憑《最後禮物》獲頒最佳劇本後在台上致謝：「《最後禮物》係講一個原生家庭嘅戲嚟嘅，好多人都問我，咦，其實你屋企咁快樂，點解你會寫一個咁dark嘅戲？咁，都係嘅其實，但係我自己覺得，因為生活喺幸福裡面，就有陣時係更加睇到失去嘅痛苦，人哋話it takes a village to raise a child*，我覺得it takes a village to raise a playwrights too！我所屬於嘅village，即係各位。20年來，喺呢個戲劇界，我哋嘅朋友裏面，我哋嘅工作人員，大家都俾好大嘅自由度同埋好多嘅鼓勵我，所以我好愛我哋戲劇呢個『原生家庭』。而呢個『原生家庭』其實俾到我好大嘅力量去面對好多嘅困難同埋好多嘅磨練，所以喺呢度我要多謝各位……老師們啦，導演們啦，同埋一齊合作嘅工作夥伴，都係好照顧我嘅劇本，我希望未來日子，你會繼續支持，繼續照顧我哋，同埋其他年輕嘅編劇……到最後我好多謝香港呢個城市，過往40幾年嚟孕育我，我喺呢度先至滿滿咁樣吸收到我嘅能量，同埋希望以後可以繼續貢獻香港嘅劇壇，同埋香港社會。」
*「It takes a village to raise a child」直譯解作「用一條村落的力量來養育孩子」，意思是一個孩子的成長，不僅是父母或者單一家庭的事，而是牽涉及整個社會。
杜Sir教大家如何面對逆境：「喺不如意嘅時候呢，你更加要提升你自己嘅自信，同埋你要堅持。更加要加強你嗰個熱情，只有熱情先可以將你當時嘅失望，或者你有啲唔如意嘅事，容易去化解佢囉。我自己都試過好多次，成日都係……佢(不景氣)得閒就嚟，大家小心啲！」
方俊杰憑《大狀王》勇奪最佳導演(悲劇/正劇)後對着鏡頭向女兒說：「你而家4歲，你未必明，生逢亂世你冇得揀，良善你可以自己揀，記住爸爸講嘅嘢！」聽到這句話時，腦海中霎時間想起這幾年的經歷，我在觀眾席上差點哭了出來。
無人能夠預計將來，我亦不敢說「永遠」兩個字，但衷心希望「香港舞台劇獎頒獎禮」能夠一直辦下去，成為香港人的心靈依存。
#「第31屆香港舞台劇獎頒獎禮」周三(6月14日)晚於葵青劇院演藝廳舉行，全晚頒發21個常設獎項，當中由西九文化區委約、與西九文化區聯合主辦及製作的《大狀王》獲獎最多，共奪10項大獎。