「粉絲局」局長
羅淑佩升職做文體旅局長，帶挈Ian＠MIRROR突破C疊跨界去A疊，有人形容局長係「粉絲界天花板」，追星追到做埋相關政策局長，亦有人講佢會唔會推動「Ian經濟」、搵Ian做旅遊大使等。當然口痕居多，甚或有啲嘲諷，不過我見唔少人都係讚賞羅局長勇於認愛，堅持做自己追星，我覺得呢啲讚賞係真心。
聽講羅局長一早就已出席好多應援活動，只係當時冇咩人認得佢，直至舊年喺一個電台節目訪問，當年佢仲係運輸署長，講講下過隧道唔使停車俾錢，突然自爆係「Hellosss」。之後去Ian活動就成日被人追訪，亦被稱為「追星署長」，不時被談論，相信喺政府呢啲咁保守嘅地方，佢都承受唔少壓力。
事實上，MIRROR出道呢幾年，我聽過無數咁多「佢竟然都追星？」嘅例子，除咗高官、仲有高管、高齡人士等，不得不承認，MIRROR係吸引到好多人投身追星行列。咁其實又有咩問題呢？我諗係「種族歧視」嘅一種，個種族叫「粉絲」。世人對「粉絲」一直都帶有有色眼鏡，覺得佢哋追星一定係唔理性、生活又空虛、使晒啲錢買周邊等等負面形象。咁點解又會有人歧視粉絲呢？四個字：以偏概全。將亡命追車、網上黑粉、私追等少數瘋狂行為投放喺所有粉絲身上。但其實我認識好多粉絲(不限於鏡粉)都係有學識、有修養嘅，社會棟樑都可以追星，而追星亦可成為成功人士嘅。
其實無論係藝人、導演、運動員或作家等，有粉絲先可以推動到成個產業，仲可以做到文化交流，好似李小龍都真係有世界各地嘅粉絲，亦將功夫帶到國際。羅局長頂住壓力大膽認愛追星，或者可以話係推動文化工作嘅一種，希望佢升咗職仲有時間追星。
又，究竟高官追星睇騷(唔計回歸、國慶嗰啲)係唔係真係咁少有？我翻查報道，前任特首梁振英在任期間都有去捧過一位歌手場，仲帶埋老婆去後台合照，是為2016年嘅肥媽演唱會。