誰還留港消費？
復活節連假200萬人出境，近日同行內朋友聚頭嘅熱話都係，香港經濟幾時復活，重點係：誰還留港消費？
我真係有留港消費，仲喺幾乎「躺平」嘅市場中，入場睇咗《膠戰 RUN FOR YOUR LIVE》，「六膠」由電視玩到上舞台。韓國嘅《Running Man》受歡迎到可以做世界巡演，將綜藝節目搬上舞台，香港相信都真係第一次。「六膠」繼續胡鬧搞笑玩遊戲，當中有唔少都係節目中嘅經典場面，係真粉先睇得明、識得笑。我都好佩服佢哋公司咁肯冒險，喺呢啲極端「淡季」試新嘢，仲要做啲咁小眾嘅騷。現場有幾多人有共鳴，明白晒所有笑位我唔知，但我作為一名普通觀眾，就覺得輕輕鬆鬆笑咗一晚，最開心嘅係，發現唔係得我一個願意留港消費。
經濟如何，大家都好清楚，業界都不時呼籲大家要多啲支持香港作品、香港市場，但實際又係點呢？今年復活節假期，除咗《膠戰》騷，演唱會幾乎全欠奉，連港產片都幾乎冇戲新上畫。諷刺嘅係，一海之隔嘅澳門，復活節假期有容祖兒、側田同洪嘉豪三位香港歌手開騷，似乎各大娛樂公司都好清楚香港復活節檔期有幾「伏」。亦都難怪，咁嘅經濟環境，開騷上戲都一定要諗過度過，否則蝕錢冇人會可憐你。
出境嘅人一年比一年多，疫後嘅復活節假似乎係死症，有人講笑話好彩姜濤4月生日，fans大力應援，市場上先叫做有啲嘢郁下，廣告有人落、商場有展覽、餐廳有人包、電車有人請、呢兩年仲有煙花同無人機表演。應援偶像之餘，仲真係支持緊本地經濟，亦令一班人一定留港打卡，粉絲以外嘅遊客，亦會當係景點之一。
近日有人就住姜濤同Ian出席大熊貓後援會安排爭論一番，一定要入咗大熊貓後援會先可以出席當日活動，成場活動亦都係講熊貓點成長，邊個係主角，我覺得都毋須爭辯。不過較少人講嘅係，兩個歌迷會都自發捐咗6位數支持海洋公園嘅保育工作。
有錢當然唔係大晒，但要支持，做好過講；要救市，做好過鬧。