好多人都好怕遇上太熱情嘅售貨員上前推銷，因為唔多唔少都會有心理壓力。一田百貨沙田店經過一輪裝修，第一期一樓部分今午開始試業，Ray昨日率先去睇過，新返咗唔少自動化設施，最適合喜歡靜靜地購物嘅顧客。
裝修後沙田店引入「無人彩妝專區」，內有14個美妝品牌、近200款唇膏和指甲油。客人係Lips n Nail Bar試完覺得啱心水，就可以直接喺隔籬售賣機購買和即時取貨。與此同時，一田超市引入大量自助收銀機，兩者均接受不同電子支付方式。Food court方面亦與騰訊和Food Gulu引入遙距點餐服務。
一田百貨行政總裁黃思麗話，留意到近年有唔少客人，特別年輕一代都比較喜歡自己睇自己試，於是引入唔同新科技方便客人，期望新形象可以帶動營業額增長約一成。至於自動化多咗會唔會請少咗人，佢就話自動化都係希望幫輕收銀同事同避免客人等太耐，唔會因為咁就請少啲人，又坦言其實現時失業率低，請人都唔易。