我就快半百，心境同十年前咁樣已經好大分別。依家成為世代中間人，上有長輩但老而彌堅，下有後輩狀態大勇，真係好感慨的。
時也命也，長輩搭上了嬰兒潮的快車，好多仲係六十歲前後。有心有力啦，仲有唔少仍未退休，仲響各公私營機構做領導。佢地一個電話就可以搞定好多事，因為佢地的人脈豐富。佢地一眼就會篤出文件上的問題，因為佢地睇文件多過食米，一睇就知有冇人響度掩飾事實。
但就因為咁，有啲長輩好容易覺得自己既然食鹽多過食米，就會變得好囂張，覺得自己叻過好多同行同輩前輩特別是後輩。咁樣，有時就會對一些反對意見聽唔入耳，一聽到有人勸諫就會先進入防衛狀態。有啲後輩見了呢啲長輩的咀臉，極為不爽，特別係最近港鐵接連發生好多事，好多人好唔妥亨叔，仲響網上玩配圖笑佢。
我又咁睇，人到了某個位置，身邊就有好多人圍住佢搵食。個個陪得佢搵食的，點會同佢講真話？好多時候，上司下屬之間，朋友之間，講真話係需要勇氣。而且，有時下屬會就住老細性格，婉轉咁提點下。不過，好多長輩都好忙，邊有時間聽你婉轉講嘢？久而久之，yes men永遠在身邊。所以當有大事發生之時，長輩就會突然斷片。因為身邊的都冇人肯講建言，咁又邊有可能有合理的反應呢？所以，筆者眼中，亨叔之問題係，佢一時唔記得咗，「謙卑」而已。老老實實，響三十年前，香港的大學畢業生剛出來做嘢，都係畀人鬧到死咁滯，但通常有人上咗位，謙卑只會越來越遠矣～。
我日日睇住後輩，都好感慨，因為佢地簡直係早上八九點的太陽。但好多時我都明白，響呢個世代，唔好好地生活，係對唔住自己，但係有樣嘢就永恆不變的，就係如果要上位，就一定要比長輩勤力。呢句點解呢？舉例，有一啲長輩，佢唔知為咩都好，開口埋口就叫後輩北上工作挑戰人生。咁如果你唔想北上工作，就唔可能只係講某政權好邪惡，咁樣係說服唔到人。你要抗拒的話，就要訴諸一些事實同埋原則。例如你拿出一大堆數字及分析，向長輩據理力爭，指出佢地分析的錯處，同佢地有原則地講理由。好多時，經過咁樣，好多長輩都會自省，既然後輩有理據有想法，點解要壓住佢唔畀佢上位呢？
香港人口老化，仲有六十幾歲人仍然在公在私佔係領導，問題係，佢地唔下來，我地中層的上唔到去，自然會塞車啦。既然係咁，如果個個好似之前亨叔咁樣咀臉，更加會人見人憎啦。但如果長輩肯去番佢地三十幾年前做嘢時的初心，謙卑多啲，多啲聽後輩的說法，願意聽多啲刺耳的聲音，到時有事個個都會撲出來幫手，係未呢？