剛去咗一個叫Gotland嘅小島參加好朋友嘅婚禮，剛好撞正呢個小島每年夏天八月份都會舉行嘅中世紀節，非常難忘。
Gotland嘅中文翻釋係哥德蘭島，係瑞典同波羅的海入面面積最大嘅一個島嶼。每年八月，呢個小島都會舉辦為期一星期嘅中世紀節。呢個節日已經有三十五年歷史喇。唔止會有中世紀主題嘅市集、表演，甚至臨時住宿，島上唔少居民、商戶、來自世界各地嘅遊客都會著上中世紀嘅服飾，好有多仲係一家大細、甚至帶埋作中世紀打扮嘅寵物嚟𠻹。聽講好多參加者嘅衫同道具都係自己一手一腳整㗎𠻹，實確敬業。而且感覺呢度人人心情都好好，喺陌生人臉上亦唔難見到微笑。路人都有講有笑，攰就席地而坐，鮮見有人會拎部電話出嚟望。
作為一個來自城市嘅人，面對此情此景心入面有種講唔出嘅感動。當然科技同城市發展為人帶嚟好大嘅方便，五光十色嘅物質生活亦固然吸引。但望返轉頭，或者我哋身心真正需要嘅嘢想我哋想像中還要簡單。或者中世紀節並唔在於參加者嘅服裝造工有幾精緻、環境布置得有幾像真，而係嗰種追求反璞歸真嘅態度。
自己第一次嚟Gotland已經係五年前嘅事，每次到訪呢個小島都得到驚喜同啟發。如果大家計劃開夏天嚟瑞典旅遊的話，不妨考慮順便到訪下呢個小島。
唔打算嚟的話，都希望你能夠搵個機會放低電話，出去接觸下大自然，同好朋友聚聚、大笑一場。做一日半日中世紀人，為自己充充電。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
Fb：為何斯德哥爾摩沒有譚仔三哥 by 三家姐
Ig：sis3ter