確診人數下滑是好事，但真的不可以掉輕心！見到新聞圖片，這幾天假期的離島逼過旺角，難道大家都以為自己係唯一放緊紅日而想去郊外透氣的人？肥珍好相信，如果航空公司話宜家開返航線，香港人一定湧晒出去……到時除咗疫情二次三次大爆發之餘，都會爆多次乘務員離職潮。
香港人經歷過沙士，有基本防範意識，已經好過其他國家好多，但確診個案仍然過千。大家都知無政府配合截斷源頭係無可能斷尾。封關講到口臭，但唔封又可唔可以認真少少對待隔離緊的人？隔離緊可以戴手帶食車仔麵、坐巴士，而我哋呢班人去完其他地方填完張觀察表，但又無人打電話來了解我哋有無人有病徵，咁填來做乜？到目前為止我只係收到一次長達五秒的「關心熱線」，咁樣真能有效防範疫情散播？
聽同事說其他航空人員留宿新加坡，當地職員用半恐嚇半命令的語氣和他們機組人員講，「要是你們踏出酒店一步就死定了！」講笑，無咁惡，係話如果佢地行出酒店，就會干犯當地法律，就會被人拘捕。所以佢哋一定只可以留喺房，而且一日會有3次video call，證明你真係留喺房，而且仲有埋full set room service，唔會餓親添。
現在不論國家城市都在努力保護自己的百姓，想辦法減少感染。但有些地方明明可以堵截源頭卻唔做，反而做很多奇奇怪怪的措施。城裡的人又能如何自救？
求上天保佑這個城市。 肥、毒、宅的空中服務員。