返工一定要頂得住代溝。
返工兜口兜面見到唔打招呼，有咩問題呀？噚晚瞓得唔夠，今日心情唔好，都已經逼自己個心講咗「HI」啦，咁嘅付出老細都睇唔到，咪係代溝囉。
個預算報告噚日要交，由噚日到今朝，個客狂追，追咩啫？我唔覆email、短訊同電話，咪即係無嘢交啦。Call咗個vendor成兩個禮拜都唔覆。兩個禮拜call咗幾多次？call一次都唔夠呀？仲已經留埋口訊話 「好急，打返俾我」，係無留電話號碼，佢個手提電話顯示唔到我個電話係正常嘅，因為我係夜晚兩點做完proposal再call佢。我先打133再call佢手提號碼有咩唔啱？無理由要俾我個人電話佢知，呢啲公司嘢。我驚第2日返工唔記得call，漏夜call定，唔係唔啱呀嘛？
老細話個客投訴，話有問題又唔早出聲，跟住又彈個proposal做得差。我睇埋《我本善良》都開工做個proposal，撐到成兩點，你唔係唔appreciate呀？我唔識做都硬食，你見我成兩個禮拜都交唔到，你係咪應該主動take up返，或者搵第二個做呢？你狂炳我成3分鐘，想講嘅point已經講咗啦，再講咪嘥晒時間係無謂對答上，乜你唔見到我黑晒面啦，一睇就知道我唔like啦，你再唔收聲，我聽日係會唔返工。雖然噚日我都無返。
天氣凍，你唔見我返工，就知道我梗係起唔到身啦。你搵唔到我，咪因為我未醒囉。我一點起身食埋午飯就覆你，都已經有交帶啦。你使唔使話今朝打去醫院check我係咪凍死咗？你猛問我幾時返，我怕你煩咪話返緊，一聽你就應該知我敷衍你啦。你信我真係返，咪代溝囉！我唔返，你咪DQ我囉。