老細最近將公司間雜物房一分為二，其中一間房可以喺裡面反鎖，仲有個雪櫃仔同一張單人梳化。老細話，呢間VlP房係整俾產後復工，要喺公司泵奶，同雪住等放工拎走嘅新晉媽咪。
以前公司只有一個雪櫃，媽咪喺廁所泵完奶，將啲奶放入冰格，有啲賤格同事會話：「佢放支奶喺我支酸奶隔籬，我好驚唔覺意飲錯咗。」又有啲抽水友會話：「最驚係唔覺意掂到佢支奶，都唔知使唔使報俾HR知，陣間佢#MeToo我就死得。」另一個就唔抵得話：「佢可以放啲奶喺公司雪櫃，我係咪都可以雪吓盒面膜先，佢個B要飲奶，我塊面唔使補水呀？」為咗幾支奶，雪奶派同走奶派日日拗，大家都話對方無同理心。最後，老闆決定間多個房，買多個雪櫃，咁大家就唔使再爭，無得嘈。
過左兩個星期，又有人唔抵得有啲媽咪用間房用得耐，同埋用得多。有人甚至無品到質疑，嗰啲媽係咪真係要泵奶泵得咁密，定係佢哋乘機偷懶。於是多奶派同少奶派又有拗撬，後來，有兩個花生友話係煙民界代表，要爭取公平公正，抗議老闆政策傾側班媽咪，漠視煙民權益。佢哋話，自己為公司搏命做，好多時忙到連煙都唔得閒食，周身唔舒服都要死撐，辛苦程度唔會低過班媽咪。
老細聽到當然唔buy：「益你啦，你可以乘機戒煙啦！」煙民最憎聽到呢啲刻毒涼薄嘅說話，嘈住話老細唔體諒，點解唔可以整間個煙房俾佢哋，搞到佢哋要騰來騰去落街食煙，完全冇為員工著想喎，仲乘機串老細會唔會同啲媽咪講：「無時間泵奶益你啦，你可以乘機叫個B戒奶。」老細聽到即刻著火：「為咗回應你哋嘅訴求，我安排咗Pantry隔籬間房俾你哋，垃圾房呀！啱晒你哋啲咁垃圾諗法。」老細仲叫佢哋唔好影衰啲煙民，因為公司其他煙民都無意見，包括佢自己。