公司創作部請咗個佛系男，第一日返工要先見人事部，佢遲到成粒鐘，既無解釋，又無Say Sorry。Sorry咩啫？食齋不如講真話，講真話咪就係佢一啲都唔覺自己錯，無錯又點Say Sorry呀？如果講咗，咪造假囉，咪違背良心囉！
人事部嬲爆話：「你咁遲，我冇時間幫你，我依家要趕去開會。」佛系男攞咗個手機出嚟話：「你搞掂啲嘢返嚟搵我，我喺度食住雞(手機遊戲)等你。」咁包容，呢啲佛性唔係個個有，人事部就冇喇，佢飆晒火話：「我點敢要你等，你即刻返上去做嘢，我開完會就call你落嚟交相填form啦。」
人事部開完會call佛系男，發現佢唔喺位，打佢手機，佢話出咗去食飯。人事部話：「我地公司lunch time係1點，食飯你早咗成個鐘 ，返工又遲成個鐘，你唔跟公司守則喎！」佛系男無駁嘴，因為佢忙住食拉麵，食到雪雪聲。人事部㷫到即刻冚電話。
佛系新人食完飯去交相，人事部啱啱落樓去食飯，叫佢遲啲再去。佛系新人話：「冇問題，我喺你去食飯時間上去補個眠等你返。」人事部即刻糾正佢：「每個同事嘅lunch time都係一個鐘，你嗰一個鐘已經用完，我個lunch time唔關你事，唔該你繼續做嘢，我食完飯會叫你落嚟交相填form。」
一個鐘定兩個鐘，你嘅lunch time定我嘅lunch time，係咪要咁執著，用咁世俗嘅mind set去諗嘢呢？人事部仲用世俗眼光去批評佛系男張相，「你呢張係證件相咩？頭髮遮住大半邊面，點用呀？你攞過張正常相再落嚟做公司證啦。」
過左三個禮拜，佛系男交咗另一張相，好明顯係將成班人去Party影嘅集體相放大，然後剪自己個頭出嚟。人事部發狂：「呢張相我地用唔到，你唔交正常相我係唔會幫你做公司證嘅。」結果佛系男都有公司證，佢攞咗同事個證，貼自己張相，再加工影印，張證無Access功能，入唔到公司。佢無所謂，佢喺公司大門等，有同事返就跟住入；冇，佢就企喺門口食雞。入唔入到公司，一切隨緣啦，善哉！