依家啲細路真係好幸福，連戲院都有為佢哋特別設計嘅。全港首間兒童主題影院CANDY PARK BY CINEMA CITY，已經喺D‧PARK愉景新城開幕。講到為細路仔而設，全院設施梗係要迎合小朋友與一家大細需要，例如影廳設有兒童座椅及家庭座椅之外，更特設半臥式座椅(圖)，另外，小食部亦提供兒童餐及家庭餐，一家人就舒舒服服咁享受電影歡樂時光嘞！
唔單止影廳設計花心思，外面俾細路仔等入場睇戲嘅地方「童趣天地」，擺放晒益智玩具及各式玩樂設施，咁就唔使悶親嘞！此外，戲院內仲有一個影廳設有舞台，適合舉辦各類活動，而「童趣天地」仲有包場服務，如果想搵個地方舉辦生日派對，喺戲院搞都好有特色喎！