咁凍，竟然仲有蚊，有無搞錯?
9度都出動吸血搵食?!
呢個世界係咪真係艱難到連蚊都要頂硬上呀?
好，你有拼搏精神，我尊敬你，我俾你吸，不過你可唔可以齋吸唔嘈呢？凍冰冰我都特登伸對腳出被窩俾你咬，你咬完就走啦，但你又唔咬，係都要圍住我隻耳係咁飛來飛去。你知唔知自己有幾煩？你要血，我咪俾囉，你又唔要。等我以為你係一隻不為一滴血折腰，同陶潛一樣不吃嗟來之食，有風骨有Guts嘅蚊。我幾乎想當你係偶像嘅時候，你最後咪又係咬咗我，仲要係咬我塊面，仲要一邊面咬一次，仲要係好痕嗰種。
你使唔使玩到咁盡，做到咁絕呀？嘈到我成晚無瞓，你唔知今日我要炳個客，唔夠精神點同佢拗Budget呀？！佢話今年要Cut 30%預算，但要我加多兩個人做嘢配合佢地新宣傳，佢又投訴我地啲同事效率唔夠高，Work Quality又差態度又唔好。
叫佢地改嘢唔係話唔夠時間做，就係話Briefing一日改幾次，做咗都係嘥時間今時今日咩服務態度呀？周圍都係Agency，你唔做大把人做。呢啲說話講咗幾個月，佢唔煩，我都聽到厭。
個市差我明，生意難做我都明，個客搵藉口屈送嘢，我都預左。個客平時用6蚊買個菠蘿包，而家得5蚊。好，見係熟客我賺少一蚊都賣。個客唔講多謝仲彈個菠蘿包用料差，焗得唔好師傅功力唔夠，我都忍仲送埋牛油，升級做菠蘿油。而家仲話想我再送奶茶通粉，夾埋做個全餐。我肯，就一定係Short咗。抑或個客Short咗？！我個菠蘿包係賣6蚊，你唔買大把人買。
BTW，嗰隻又吸我血又嘈到我無覺好瞓嘅蚊，今朝俾我拍死咗啦！