我成日諗，如果梵高早一點得到大眾認同，佢嘅一生同影響力會有咩唔一樣。然後好自然再諗到，我哋又一直忽視咗幾多本應更不平凡嘅人？如果每個人發光發亮之前得到更好的塑造支援，係咪最後可以更光更亮呢？
單單以上一點，已足夠令我覺得做年輕人工作充滿意義。就算我面前唔係個個梵高咁款，都總有唔同嘅長處優點值得我哋肯定，令佢哋發揮更好，為社會貢獻更多，係咪好有意義呢！但係，有意義還有意義，都要做得嚟先得。成日有人問我點做好年青人工作，我其實唔知呀，我無formula，但可能就係因為無formula，唯有見步行步，見步行步反而更加度身訂造；度身訂造，通常都貼身啱啱好。
小題：識潮語、玩IG = 年輕？
不過如果一定要講一樣我覺得要特別留意嘅，應該係：每個人每件事都會過時。無論你幾叻都好，依個仍然係違反唔到嘅定律，所以唔需要去追潮流。三歲嘅小妹妹同三十歲嘅OL著住套公主衫去迪士尼效果係點都唔會一樣嘅，所以唔好以為識幾個潮語，開個ig，就同年輕人接到軌，咁諗可以好弄巧反拙。況且，都無人講過做年青人工作一定要自己都後生，或者心態年輕。
有咗咁嘅心理準備同自知之明，就可以做返自己角色，真心理解佢哋需要；信任班後生，即使佢哋嘅處理方法同你未必一樣；有退位讓賢嘅胸襟同埋共同協作嘅寬度。講就容易，做到呢，其實就係我心目中好嘅「年輕人工作」者必備嘅條件喇。
最後，我成日周街見到「創新」兩個字。人人都講，咁到底係咩嚟呢？我自己未有答案，我只知道，創新唔應該只係一個口號，講咗當做咗。
王仲傑 填詞人，社企籽識教育、陸續出版創辦人
HKSI URL: http://www.sie.gov.hk/go/kit-wong