廣東順德有「魚米之鄉」美譽，不單物產豐富，美食亦特別出名，香港要食到正宗順德菜，選擇唔算太多。不過阿Ray最近應公關朋友邀請，有幸去尖東帝苑酒店帝苑軒品嚐一席順德名菜。
帝苑軒舊年8月搞過一次順德菜月，好評如潮，今年徇眾要求再encore，Ray一見到個menu即刻食指大動，道道都係順德地道名菜，例如大良生拆魚蓉羹、砵仔焗魚腸、煎釀鯪魚，籠仔牛腩蒸陳村粉等，仲有一味勒流蒸污糟雞，更加不同凡響，當然唔少得係飯後甜品薑汁雙皮奶啦；身邊老友咁橋係順德人，聽佢講所有上盤名菜全部都好考功夫。
Ray一見到酒店中菜行政總廚何偉成到場打招呼，立即第一時間豎起大拇指俾個like佢。原來何師傅本身亦係順德人，煮家鄉美食可謂駕輕就熟，何師傅由細到大都鍾意食魚，但煮得一手好菜絕非僥倖，真係要靠個人勤力，咪睇煎釀鯪魚、生拆魚蓉羹好似好簡單，其實全都好考心機。順德菜月去到下個月底，係就快手啦！
