每晚打開電視，除了「仍是『偵緝檔案』」不知凝視到幾時之外，還有避孕套晚晚要有性高潮，要幾High有幾High，女演員繪形繪聲交足戲，再有加藤鷹大師登場(圖1)，用招牌雙指推銷Air Max一路向西，避孕套都有Air Max版，咁Nike呢？
Nike就唔聲唔聲又拍咗一套Nike China版《中英街7號》，強國足球飛機夢，真的要幾High有幾High，誓要打入國際球壇大舞台，就算係造假拍廣告，講2033年世界大賽上演英格蘭對中國(圖2)，仲要頭條新聞話英格蘭在死亡之組哭泣，中國都有C7，China 7是姓Liu，最後，原來只是一場源自甚麼「一笑紙業」紙巾廠足球夢，擺明曲線笑L你，知冇？
肉麻當有趣呃廁所文青
政務司司長張建宗自鳴得意問劉鳴煒(圖3)，你知唔知乜嘢係「登登登凳」？原來係玩貝多芬《第5號交響曲》嗰4粒音(嘩！真係要俾10個趣呀)，然後，真係搵幾個青年人推住幾張辦公室凳埋位推銷「青年委員自薦計劃」，接力再唱「呢一張凳」，個個坐得好似好暢所欲言，最後一鏡，兩條友陰陰咀笑，加埋一張空凳同你講「我哋等你埋位」，忽然令人極度心寒，一張丟空了冇人坐的，必屬「凶凳」！
唔想坐「凶凳」，可以做洗廁所文青，一支支普通洗潔劑，搵一班知名文人寫幾句包裝一吓，真的臭都可變成香，甚麼「人生有如一座馬桶」？又或「請感激請你洗廁所嘅人」？現實話你知，清潔工人懶理你哋美其名扮乜嘢洗滌文學(圖4)，點解要洗廁所？係窮呀！「X你個X！」
就好似港鐵如何扮新海誠來粉飾洗底，結果，你的名字依然是廢鐵！
借偶像鼓吹消費 Fans還得到先好借
最可怕是，借錢太遲，借貸廣告力銷及時雨，重酬力邀明星做財仔廣告代言人，陳奕迅玩感性，氹你要借就即刻借，張繼聰教你借錢換一個全新人生，阿葛「I 葛A Dream」借錢尋夢，張智霖千萬貸款15分鐘批核，鄭秀文主打OL目標觀眾力銷只有渣打做得到，Eric Kwok同楊千嬅導你盲目Shopping碌卡分期找數……請記住，他們都是不需要借錢的明星，做fans還得到先好借！
更搞笑，還有黎明呢頭扮老人呃老人買退優人生年金(圖5)，全程慨嘆生活開支乜都貴，退休冇收入，點應付咁多開支，嗰頭又幫EPS同你講一大堆「有雞定有雞蛋先」道理，最後結論竟然係最緊要買嘢買嘢買嘢，消費消費消費……自相矛盾，精神分裂到一個極點。