點解辦公室助理去咗送信無換水？女神寧願Dry到皮膚乾唔上粉，兵仔寧願谷到生腎石口臭，都唔肯行近pantry？因為撞啱要換水真係恐怖過撞鬼。道行高嗰啲，咪對住個空水樽都當睇唔到。道行淺、時運低嗰啲，咁啱撞到大口秘書，咪要上身囉。
辦公室水機嘅水，十幾公升一桶，又大又重，水樽封口用嘅真係硬膠，硬到每次開都好似同佢拔河咁，自從小學之後，有幾多人仲會玩拔河呀？換水咁小學雞，邊個想做呀？最慘係出盡力扯，塊硬膠郁都唔郁下，就好似平日出晒力、流晒汗咁sell橋，個客成尊佛咁坐定定喺度，表情都無個，俾啲戲過你都費事。飲杯水啫，使唔使咁挫敗呀？呢種感覺公司唔係要體諒咩？公司更應該熟悉勞工條例，知道撞崩咗隻Gel甲係無得Claim工傷同攞病假，保險又唔cover，咁點解要員工犧牲先？
講呢啲？！咁換水可以回春又算唔算犧牲先？叫嗰啲瘦到寒晒背，或者肚腩大到著唔到襪，成日吹水話要挑戰自己，隨時可以練到6嚿腹肌，勁過森美陳豪嘅Oppa。一日換三次水，不停做拔河，托舉。練二頭肌、三頭肌、四頭肌，連不隨意肌都練到硬淨晒。可以逆轉肌齡，有心有力。每次喺pantry換完水，D女同事都尖叫：「你好叻呀！好勁呀！」呢啲滿足感、英雄感同快感，可以喺邊度攞到？
Oppa放假，平時成日著住平底鞋、直筒褲針織top，短西裝褸，一副好打得嘅樣嘅Ajumma就會飛撲出嚟換水。一日要飲8杯水，咁先健康。無水飲，係傷害身體同摧毀健康信念，破壞性好大。面對危難嘅人可以抬起一架van仔，換十幾公升嘅水又算係咩。係囉， Ajumma要救地球，唔通同佢搶咩？