清純又乖的Cathy請我食飯，多謝我幫佢揾到份好工，佢仲話會請埋舊同學Heidi一齊嚟食，事關Heidi啱啱同老細炒大鑊，心情好低落。Cathy話好想幫佢cheer up，仲希望我俾啲工作意見佢。
Heidi一到，即刻同Cathy講：「呢餐你請，氹吓我開心，我想食海鮮。」跟住就叫咗海斑、龍蝦、鮑魚、帶子，仲有皇帝蟹。嘩！Cathy應該唔止係佢同學咁簡單，仲係佢債仔，咁樣俾人放血，前世欠佢咩？一餐飯食咗佢三分一人工呀，陰功！
Heidi一路食一路呻：「我老細無vision唔識搵大錢，old school到死，我叫佢用social media做promotion，佢又晤聽；提議佢做crowd funding集多啲錢發展又唔做。我建議開發啲新product，佢又話驚侵犯到人哋版權，乜都唔敢，點抓緊機遇呀？唔怪得佢盤生意幾十年都做唔大，年年都得嗰幾千萬盈利，人地炒兩間豪宅都揾錢多過佢，用埋啲傳統思維做生意，點會發達呢？」
我問佢做過啲咩發達生意，佢話冇，不過如果老細交盤生意俾佢做，一年起碼double依家啲收入。我問佢老細做咩生意，佢話做印衣紙。吓，即係同元寶蠟燭香一齊燒嗰啲衣紙呀？咁做咩social media呀？揾KOL推介第一身試用結果呀？叫消委會測試唔同衣紙公司生產嘅紙按摩椅邊隻襟燒啲呀？呢盤生意仲要做crowd funding？唔夠錢咪搞量化寬鬆囉，我相信冥通銀行貨幣認受性，仲高過Bitcoin啦。
Heidi繼續講，話集資可以將衣紙生意做大，例如開個衣紙平台，俾人自選衣紙款式，仲可以有名牌同款。佢又建議出「比卡超」紙紮公仔，但老細話唔可以侵權，Heidi竟然話就算個版權無遠弗屆，都唔會cover到陰界啦。佢仲預咗「雙12」搞促銷，喺12點12分做埋優惠，買一隻「比卡超」，送一隻「高達」，送禮自用，看吓門口都好。
無錯，Heidi思維係就係前衛，但其實使咩印衣紙？印報紙仲好啦，裡面乜名牌都有，又樓又車又衫又手袋又家電，啲人睇完就攞去燒，一物兩用，佢間公司仲一定係全球「燒」量冠軍呀。
最後，我問佢究竟呢位唔識搵大錢嘅老細貴姓，先知道Heidi原來一直講緊嘅就係佢老竇。