新鴻基地產每年有兩項重頭公益活動，都係同體育有關，一個係跑樓梯嘅「新地公益垂直跑——勇闖香港ICC」，另一個係考單車技術嘅「新鴻基地產香港單車節」，新地執行董事郭基煇(Adam)都身體力行落場參與，事前更落力練習，認真投入。
日前兩項活動舉行支票頒贈儀式，垂直跑收益不扣除活動成本，全數撥捐香港社會服務聯會及香港公益金，而單車節部分報名費就撥予香港小童群益會及香港公益金。Adam之後仲宴請受惠機構有關工作人員同一班義工慰勞一番，好多謝機構一年來的努力，又邀請了幾名受惠人士同在場傳媒分享下。
其中香港小童群益會自2015年起就獲資助「新地資優科學創意發展計劃」，為就讀小三至中二的基層資優學童，提供免費STEM(科學、科技、工程、數學)課程，以發掘學童的才能。其中一個受惠家長招太就同Ray講，她的一對龍鳳胎子女同讀小五，在校內數理成績突出，但礙於經濟問題，並無資源加以栽培。學校前年推薦其子女參加計劃，令子女開闊眼界，更發掘到相關潛能，經常利用學到的知識自製玩具。