位於中環必列者士街嘅新聞博覽館唔經唔覺已經開咗一年，博覽館副主席陳淑薇(May姐)噚日就約埋一班記者行家茶聚。May姐透露，已經有5萬人次參觀過，即平均每個月都有4千幾人，對入場人數感鼓舞，但就和原本預期7萬人次有差距。整個香港受到近期社會事件影響，原來博覽館都係，May姐話，原本有31個導賞團、約1千人要取消或改期參觀，不過，近兩星期社會氣氛有所緩和，參觀人數都開始回升。
陳淑薇
蘇鑰機
現時個別公眾人士參觀博覽館係免費，只係部分互動遊戲要收費，而團體則入場收費，但玩入面互動遊戲則有優惠，都係為咗補貼營運開支。May姐話，現時每年營運成本大約900萬，現在未做到收支平衡，將來舉辦講座可能會收費，同埋希望有善長人翁可以支持博覽館繼續營運。
問及遲啲會唔會考慮下搞返嗰有關「反修例風波」展覽，博覽館展覽策劃委員會主席蘇鑰機教授就話肯定會有，但舉辦時間就要睇時機，今年或下年內就未必會有喇，但佢預計喺新聞界多個有心人嘅支持下，效果應該會唔錯。