風靡萬千小朋友嘅Hatchimals Egg，噚日嚟咗am730報社表演孵化！可能大家唔知呢隻玩具蛋有咩特別，要睇佢表演孵化，查實佢幾架勢，今年10月喺美國一出就好快賣斷市，仲搞到全球缺貨，香港的玩具”反”斗城早前入嘅貨，亦早已售罄。
到底呢隻蛋點解有咁大魔力？Ray就目擊佢嘅誕生過程，原來都幾趣緻，因為隻蛋裡面嘅絨毛玩具動物識得同主人互動，無論你輕撫佢或敲吓佢，都會有不同反應，叫聲仲好柔和，聽到人都冧晒。到差不多夠鐘出世時，佢就會一下一下咁啄開個蛋殼，有時又會累到喘氣，要主人撫摸蛋殼安慰。唔係講笑，成個過程少啲耐性都唔得，所以當隻玩具動物成功破殼而出後，大家都好似自己有份生咁，輕鬆晒！
唔好以為出咗世就玩完，隻玩具動物仲識得為自己唱生日歌，然後就會以雙眼嘅顏色變化嚟表達心情，與主人互動，例如紅色代表唔開心、綠色代表生病，要主人細心照顧，有時又識得回應主人動作，例如拍翼前行，或發出古怪聲音等。有同事話好似以前嘅電子寵物他媽歌池咁，Ray覺得都係，但呢隻蛋就比較實在。
講咗咁耐，或者大家都想買嚟送俾小朋友，玩具”反”斗城將會趕及聖誕前夕在港限量加推，於本周四(22日)早上10時起，喺尖沙咀海運大廈旗艦店發售聖誕限定禮品裝，限量300套，售999.9元，套裝內附玩具”反”斗城禮券300元一張。