擁有68年歷史的北角皇都戲院早前強拍成功後，發展商新世界發展話會盡力保育，並會修復及重塑戲院面貌，外界反應不俗，希望當年輝煌嘅戲院得以重生，再現芳華。Ray昨日有機會同傳媒朋友入內參觀，一睹其現狀，原來真的非常殘破，相信要修復都要花唔少工夫同心思。
毛Sir
現場所見，好多物件已經由工作人員貼上便條保留，就算係外貌普通的一枱一椅，只要係反映到本身的時代，都有可能留低，相信保育工程非常繁複。原來當年的戲院改建為桌球室時，或者為了方便及節省成本，並未有把原本的座椅等拆除，只係在上面搭建另一個構築物做地台，咁樣反而保留了當年戲院的內部結構，想要找回堂座、超等、特等座位等本來面貌，會較為有跡可尋。對於呢一點，一同參觀的顧問團隊成員，前香港話劇團藝術總監毛俊輝(毛Sir)話，好樂意加入顧問團隊，因為佢對呢個戲院好有感覺，而目前多數表演場地都是政府的，安排上彈性有限，希望皇都將來發展成一間好好的私人擁有劇院，發揮推廣文化的作用。
桌球室不少物件都貼上便條保留。
睇返當年，皇都戲院曾是五十年代香港演藝殿堂，曾在此演出的世界頂級大師或組合，包括英國作曲家Benjamin Britten與男高音Peter Pears、小提琴家Isaac Stern、 爵士單簧管大師Benny Goodman與樂隊、日本松竹歌舞團、維也納兒童合唱團等等，真係幾勁，相信大家都有所期待。