自港航傳出釘牌危機，網絡亦開始沸沸揚揚，一面倒地叫好，支持港航倒閉，情況敵對如美心，凡中資就該死。港航是中資，母公司海南航空大家並唔係今日先知，抗爭就we connect，出事就用完即棄？香港人，睇人X街真係咁開心？
之前機場「和你飛」、「和你塞」活動，國泰就算當時仲有工會，發聲明都未及港航快，當時令幾多架機停飛，唔知香港人仲記唔記得，唔記得唔緊要，當時有講過港航好嘢、吹奏港航係真香港人航空的留言紀錄依然係度，又有無人想回帶睇下？
肥珍見證住唔少港航朋友呢排的FB同IG灰到極點，見到網絡咁涼薄的回應，佢地唔係嬲，係灰心，唔係話香港人齊上齊落，一個都不能少咩？當時大家瞓得一兩個鐘由外地返港，一land即刻換衫走出去，而又因為乘務員請假容易，大家port得就port，一齊抗爭，但卻換得如此下場，教人如何唔感到絕望？
講到公司，「紅底」就原罪？自傳出航空界白色恐怖，國泰頻頻疑因政治取態炒人，又出真跪低噁心post，無人再敢表達意見，大家就表示理解。港航事到如今都無出現過大幅度炒人，員工收工後的言論依然自由，亦無人因為特別日子請假而秋後算帳，就被人話早該收檔，公平嗎？
因為公司背景而產生偏見完全理解，但因而唔記得企過出來的香港人甚至反轉豬肚就係屎，呢點絕對不能接受。
不分化，不割席，唔止係一句口號，團結先可以行得更遠。
肥、毒、宅的空中服務員。