最近屋企買咗好大梳蕉，都未完成到半梳，啲香蕉已經開始變熟變黑。剛好家中有個朱古力香蕉蛋糕食譜，其中講明最好用熟到爛嘅香蕉，做咗蛋糕出嚟都唔錯喎。相信人人家中間唔中都會有啲熟到爛嘅香蕉，就咁掉咗佢實在太可惜喇，趁呢個機會同大家分享下呢份瑞典口味。
牛油75克、砂糖2 1/2dl(約213克)、牛奶2湯匙、幼鹽1/4茶匙、雲呢拿糖1茶匙、雞蛋2隻、熟香蕉2隻、朱古力100克、中筋麵粉2 1/2dl(約130g)、小蘇打粉1茶匙
1.首先將牛油煮融，攤凍備用。將熟香蕉碾爛，備用。將雞蛋嘅蛋黃同蛋白分開，備用。
2.將攤凍咗嘅牛油、砂糖、牛奶、幼鹽、雲呢拿糖撈勻，再加入埋香蕉泥同蛋黃，撈勻。
3.將麵粉、朱古力碎同小蘇打粉撈勻，一同加入之前撈好嘅混合物，撈勻。
4.將蛋白打成泡沫狀，再小心加入埋之前撈好嘅混合物，撈勻。呢個步驟要溫柔點，唔好破壞蛋白泡沫嘅結構。
5.準備一個個底拆得出嚟嘅焗蛋糕模，先喺模內輕輕抹一屬牛油，再倒入麵糰。放入預熱好攝氏175度嘅焗爐度，焗30至40分鐘。焗完後，可以用細刀拮一下入蛋糕中心，抆返出嚟後刀面仲濕濕哋就最為理想。
6.出爐，攤凍後脫模，然後就食得喇。
呢款蛋糕雖然唔係靠外表取勝，但佢外脆內軟，香蕉味重得嚟非常天然，唔會有藥水味，配雲呢拿雪糕同熱紅茶簡直一流，我同先生一晚內已經清咗大半個蛋糕喇，大家有興趣嘅不妨一試！
*注意：製作蛋糕時請注意安全。小朋友冇大人陪同下千祈唔好亂試。