喺香港想食燒鵝，總有一間斬料舖喺左近，再唔係就直入深井，總不會空手而回。不過喺瑞典，平時其實好少有機會食鵝。今日想同大家介紹呢個以食烤全鵝作為習俗嘅節日，於每年11月11日嘅聖瑪爾定節，St.Martin’s Day。
瑪爾定生於公元316年，係法國最著名嘅聖人之一。瑪爾定年輕嘅時候曾經加入軍隊，後來佢因為種種理由而選擇退伍，成為咗名天主教隱士。隱修多年後，當地人民推舉佢為當地嘅主教，可惜瑪爾定根本無意擔任呢項職務。相傳瑪爾定為咗逃避民眾同大家同佢嘅期望，試圖匿埋喺鵝舍之中，可惜班鵝嘅叫聲始終出賣咗佢。瑪爾定於公元397年11月逝世，並於同月11號埋葬。自此人民就開始喺每年嘅11月11號食烤全鵝去紀念呢位聖人，某啲講法仲話食烤全鵝其實係為咗報復鵝當年對瑪爾定嘅出賣㖭。
喺歐洲各地一直都有慶祝聖瑪爾定節嘅習俗，後來呢樣習俗吹到嚟瑞典。最早有關「瑞典人食鵝慶祝聖瑪爾定節」嘅紀錄早於1557年已有，去到十九世紀中期先開始喺瑞典南部地區Skåne普及。
聖瑪爾定節嘅慶祝活動，至今仍然喺瑞典南部地區Skåne較為盛行。當地嘅瑞典人會以稱為「黑湯」(瑞典語：Svartsoppa)嘅鵝血湯作為頭盤，烤全鵝作為主菜，而甜品會以蘋果蛋糕(瑞典語：Äpplekaka)作結，分量十足。
個人暫時未食過呢份烤全鵝盛宴。雖然瑞典烤全鵝聽落非常吸引，但我都係想食港式燒鵝瀨多啲。唔使日日食，一年俾我食一次就心滿意足了。