啱啱同瑞典家人慶祝咗一年一度、其中一個我最鐘意嘅瑞典傳統節日——小龍蝦節 (Kräftskivor)。
顧名思義，小龍蝦節就當然係關於小龍蝦啦。每年大概八月，幾乎瑞典嘅家家戶戶都會聚埋一齊慶祝呢個節日。不過除咗主角蒔蘿汁小龍蝦，必食嘅仲會有芝士批、烈酒、啤酒。參與嘅人仲會戴住各式各樣印有小龍蝦嘅紙帽同圍裙，邊飲酒邊唱關於小龍蝦嘅歌慶祝。我仲曾經參與過一個小龍蝦派對，指定來賓要著到全身紅色直接扮小龍蝦𠻹，瑞典人對小龍蝦嘅熱情絕對不容小覷。
相傳因為每年八月開始就係瑞典合法捕捉小龍蝦嘅季節，大家都想趁呢個機會大快朵頤。時至今日，其實邊個月想食都經已唔成問題。因為除咗瑞典本地嘅小龍蝦，來自唔同地方都有，例如土耳其同中國等等。但瑞典人仍然堅守呢個傳統，每年到咗呢個時候就會相約一大班人飲飲酒、唱唱歌。
雖然次次都會食到對手損晒，又成身都係臭蝦汁，不過仍然非常享受。其實世界各地咁多唔同嘅節日，講到尾都係人們想製造個原因同親友聚聚，一齊開心下，醉翁之意不在酒吧。
據我所知，香港有嘅瑞典連鎖傢俬店都有得賣雪藏嘅小龍蝦㗎，推薦大家一試呢！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
FB：為何斯德哥爾摩沒有譚仔三哥 by 三家姐 IG：sis3ter