喂！我知條題係好娘，改到好似自助餐主題咁，但今次Involitini個Landscape of Italy真係帶我用舌尖遊覽意大利喎！
今次個靈感係嚟自行政總廚Jack之前去意大利旅行時所啟發，由個海玩到出水面再行埋上火山，每道菜式都好有意思，睇得出花咗唔少心思。6道菜式當中，以泥土同雲石主題最令我印象最深刻。前者其實係手造意大利幼麵配雅枝竹蓉同白蘆筍，Involitini嘅手造意大利麵正到拎完米芝蓮推介，跟手再俾啲食客係咁叫(逼)阿Jack賣埋product，等大家可以拎返屋企煮，新鮮手造，口感夠al dente，而且夠掛汁。Jack選擇同樣由泥土種植嘅雅枝竹同時令白蘆筍，感覺清新，貫穿成個主題。而「雲石」嘅造型像真到個個都忍唔住嘩咗出聲，以新鮮日本黑鱈魚搽上蛋白同墨汁後包緊慢煮，最後淋上蜆汁cream，再用墨汁畫出雲石紋，賣相已經夠搶，加上新鮮日本黑鱈魚油分十足，魚肉入口嫩滑多汁，比平日食到嘅急凍鱈魚多份鮮甜，絕對值得一試。
Involtini Italian Cuisine │銅鑼灣駱克道459-461號The L. Square 11樓全層 │2658 2128
Landscape of Italy │每位$568