一班好友兼舊同事出來聚餐，一屁股坐下來就各自倒一堆是非出來互相交換，說說笑笑一大輪。
大家都笑說很羨慕G小姐，因為她其中一個身份是旅遊撰稿人，可以自遊自在到處飛。G卻謂：「邊有你哋講得咁好？香港啲稿費有幾微薄你哋都好清楚，淨係靠呢啲搵食餓死咗！」再者，因為G很多時候都是接受外國旅遊機構邀請，採訪、食飯、搭車等幾乎分分秒秒都對同一團人，「團友」們友善、易話為就會是個happy trip，否則未來的幾日都只會令人覺得「來回地獄又折返人間」！「試過有一回我哋一大班記者、writer 3月份去日本本州東北部，當中有個洋妞記者妹終日口黑面黑，好奇一問原來佢臨危受命代替病咗嘅同事出差，一身古銅色肌膚嘅佢話：『如果我自己揀一定去啲陽光與海灘嘅地方！』果然，佢真係淨係知呢個世界只有sun and sea，因為佢只有一個hand carry size嘅行李，好明顯係帶唔夠衫！」G說當時正是溶雪之時，氣溫也很低，洋妞記者妹只有第一天跟大家吃過一頓晚飯後就沒再現身，餘下的數天只有轉酒店和乘車時才現真身，但全程披着旅遊巴司機自備的毛氈保持面燶樣子，令同行一團人都不敢言笑，生怕會得罪她似的。
其中一位朋友問：「咁個搞手唔會有意見咩？個洋妞又出唔到去影相、採訪，又乜活動都缺席……」大家可能有所不知，許多外文傳媒的記者、寫手，出trip只會隨手拍幾張照就退到大後方去，而香港記者們一人分飾多角，又採訪又拍照又影video，有些writer更會做fb live和影360全景影片，相當忙碌。G嘆謂：「所以唔好吓吓以為我哋出到去就好似食好住好咁，其實都有好多心血要付出。」我都是幹這行，明白的，不明白的就只有坐得office太久的……。