年初三赤口不宜拜年，Ray認為最啱就係去沙田馬場行個大運，沾下旺氣！農曆新年賽馬日將於下月18日開鑼，市民入場即可獲贈一支「招財筆」及一張抽獎卡，更有機會贏到「馬到功成」24K包金擺件。當日冇入馬場都唔緊要，新春金多寶將於年初五(20日)攪珠，頭獎基金估計高達6,000萬元。
馬會昨日於跑馬地馬場預告新年賽馬日詳情，由馬會行政總裁應家柏燒炮仗，再由兩位見習騎師潘明輝同巫顯東客串舞獅，相當有新年氣氛！上年新年賽馬日錄得逾17億元投注額，打破歷年紀錄。馬會市場及客戶事務執行總監張之杰(Richard)對今年市道都好樂觀，估計投注額都有3至4%嘅增長，至於入場人次方面，因受制沙田馬場本身嘅容量，以及會實施人流管制，就會同去年相若，約有96,000人次，當中有兩成係內地及海外遊客捧場。
