每逢農曆七月，鬼門關大開(有人話)！街上不到10點就空空蕩蕩。其實在這段限聚令下的日子，限食限飲時期的街道都一樣冷清，只是因為七月的風，為長街增添了一分陰森。這讓肥珍想起上年農曆7月在菲律賓的一段小故事。
又菲律賓？沒錯！新年、聖誕、中秋，唔爭在鬼節也飛律賓。是咁的，有看開肥珍膠行周記的讀者，應該記得曾經提過菲律賓酒店之「猛」，今次事件又發生在酒店，建議感到驚恐的朋友睇埋落去，因為會仲驚。
Check in後，同事J插卡入房，門鎖無燈著，但推得開，入房見到個女人坐在梳發上睇電視，兩人對望。同事J嚇到鼻哥窿都無肉，但無即時離開，反而安慰自己「時運高時運高，你睇我唔到，我都睇你唔到」，之後哼起走晒音的小調壯膽，一邊強裝鎮定收拾行李。
終於聽到個女人開口，用京腔吼道：「你要幹甚麼！」同事J嚇到尖叫，衝了出房。事後才知道入錯了房，那裡真的是住了一位京城遊客。