世界上有許多事情，都是原則性的問題，並沒有討價還價的空間。然而當你主動跌入別人「討價還價」的陷阱當中，對手就會知道，你的所謂原則並不真實，底線也只是虛構出來。你的底牌一下子被人揭穿了，往後你就再沒有半點議價能力，對手也會永遠把你看扁。
情況就像老細要你減人工。你本來收開5萬，老細話，經濟唔好，跟公司共渡時艱吧。下個月起，人工由5萬減到3萬吧。你聽了當然覺得瘋狂，5萬減到3萬？你是不是有病？你知唔知道我係專才，喺出面係有價有市嘅搶手貨？你減我人工，我咪劈炮唔撈囉！你咪試下喺外面搵人頂我個位，睇下搵唔搵到？到時睇下係我傷啲定你傷啲？
老細被你拋了一拋，於是將逼於無奈將減薪計劃擱置下來。老細一向都很方丈，那一刻雖然將計劃暫且擱下，但做得不情不願。你其實也知道，老闆必定有後著，將減薪計劃重新包裝捲土重來。問題只是你不知最後會包裝成怎麼樣的樣子，以及新的方案何時會來。
說時遲那時快，原本那個減薪計劃才擱置了不久，方丈老細忽然找來了幕後大老闆開腔說話，聲討你近年工作表現不濟，效率又不理想云云，所以決定將你人工由5萬減到1萬。1萬？你是不是瘋了？你知道我出去外邊撈可以收幾錢？於是你便重施故技，又威脅劈炮唔撈了。然而幕後大老闆比起你頂頭的那個方丈老細，氣勢來得強，表面上態度也好像很強硬，很戰狼。佢兇你：「人工我減硬你㗎啦，呢個係公司不容挑戰嘅底線！」
面對眼前這條戰狼，你忽然感到怯了。打工仔面對大老闆，當有正面衝突時，感到膽怯我覺得其實正常不過吧，打工多年，之前一直都是安安樂樂地食著幾家茶禮，有幾何會遇上這般大場面？當情況變成這樣，你眼前也只有兩個選擇吧：一、是繼續企硬。我即使失業冇得撈，但你冇咗我我睇你搵邊個代替我？咪以為扮戰狼叫幾聲我就會驚先得㗎！5萬就係5萬，一個仙都冇得減！又者是，二、噢，阿大老闆，1萬就唔好啦，不如返番去之前個plan，cut到去3萬就算啦。emmm…如果「只係」減到3萬，俾我自己有權去揀幾日做annual leave，或者上班時間可以俾啲彈性我…3萬，都應該可以接受嘅。一人讓一步，好唔好？
如果是你，你會如何選擇？我個人就傾向相信，打工也好做生意也好，苟且偷生最終只會換來更大的欺壓，情況就像小孩子被死肥仔惡霸欺負，跟肥仔討價還價可否打少兩拳一樣。結果會如何？肥仔只會更加看不起你，然後把你打得更傷更痛。真正會讓死肥仔打少兩拳，甚至不敢再打你的，是你先要企硬還拖，然後搵救兵幫忙。