警隊拜關帝保祐查案順利就係人都知，原來有個環頭嘅供奉對象另有其人？呢個就係黃大仙警區喇，當區指揮官曾艷霜昨日邀請咗Ray，一睹佢哋拜大仙儀式，警隊前一哥李明逵都嚟撐場。原來對上一次辦類似儀式已經係9、10年前，今年再辦原來係要慶祝有17名同事升職，人數屬近年最多，所以決定要大搞賀一賀佢。
Madam曾仲同Ray講，拜黃大仙呢個傳統源遠流長，早喺1964年當區治安麻麻，警署拜過黃大仙後就變得風調雨順，而家供奉嘅黃大仙畫像仲係由當時一名負責拼圖、掃描嘅警員幫手畫，仲保留到而家，細睇畫功都認真唔錯。