野菌龍蝦酸辣羹 $238
魚子芙蓉龍蝦球(一隻) $598
W酒店中菜廳星宴總廚陳忠秋師傅雖然唔擅於上鏡宣傳做訪問，但一直以嚟默默耕耘，久唔久就會推出新菜式，等大家有驚喜，亦樂於繼續捧場。
師傅最近推出以龍蝦做主題嘅菜式，選用本地龍蝦，隻隻都游住水嚟，非常生猛。 本地龍蝦體積雖然比較細，但佢嘅肉質就非常嫩滑。師傅嘅菜式唔花巧，以傳統粵菜為基礎，不過就係愈家常愈簡單嘅菜式，要將佢煮得令人有驚喜先係最難嘅地方。魚子芙蓉龍蝦球，其實咪又係龍蝦炒蛋白，家常到不能再家常，我相信大部分師奶都識煮。不過，到底點解先可以做到師傅咁，龍蝦肉細緻嫩滑，彈牙鮮甜，當然係佢功架所在。蛋白滑溜得嚟唔鬆散，可以一撮夾起，混入啖啖肉嘅龍蝦當中。最後加上魚子點綴，裝飾之餘為菜式加上鹹鮮，亦令賣相更矜貴。話晒都係酒店中菜廳，當然要加啲貴價食材啦。至於另一道啲龍蝦多到你以為唔使本嘅酸辣羹同樣出色，酸、辣、鮮、香俱備，飲完好滿足。
星宴中餐廳│香港W酒店1/F