政治官員的任命，固然大家之焦點，係放響人選，邊啲人做邊個位。我都一把年紀，當然理解一個人點樣可以破壞晒一個制度啦，但係，響依家呢個年代，制度之安排，一樣重要。
例如人見人憎之侵侵，佢又選到做總統。當然，以佢依家對美帝政治之破壞力，有目共睹。但係，關心美帝政治的人士，亦想理解一下，點解會響呢個制度之下，贏了選舉呢？要再避免一個立場偏激、處事違綱、執法亂紀之人士再做總統，係未美帝的選舉制度出了問題呢？點樣去避免出現侵侵二世、三世呢？美帝一啲有識之士正在思考緊一個方向。
因此，香江要避免次次政治任命之公布，就會出現眾口譁然之現象呢？就要一個好之制度啦。一個好嘅制度，就有機會令到大部分委任出來之人士，畀人感覺係有能力勝任嗰個職位。咁至少就係建立一個令人有信服力嘅委任制度。例如，台灣之馬英九政府，係出名一樣嘢：學者問政。點解咁樣，有幾個理由。其一，九哥係讀書人出身，比較鍾意同學者一起工作，換另一個角度，佢好自大，覺得非學者出身的人水平唔夠啦；其二，專業問政，因為只要嗰個學者係某個政策範疇之專家，就邀請佢地入閣；其三，九哥係政治乾淨界掌門人，委任學者做部長就可以避免外界嘈佢，派餅仔益自己人，官商勾結呀咁樣。
呢啲學者治國之思路，其實同專業治國之思路一脈相承。專業治國之思路係，委任嗰個界別裡面有相當資歷之專業人士去做嗰個部長。呢度都有兩個可能。一係就係嗰個人才，響一個專業界別有專業資格，又或者係學者，做咗幾十年；另一樣就係嗰個人才係政客，但長期就跟進嗰個政策，久而久之就成為專家。
所以，外國經驗可見，元首有完全的自主權去委任外界人才，但現實上最大的前提，一定先以專業治國的思路為先，咁樣至可以畀人感覺係用人唯才，而唔係政治酬庸，為咗要還政治債，邊個政黨推薦邊個人，就叫手足食邊個。而且，響國外的政治任命，唔會做做下就跳來跳去，響台灣，邊有人上個月做緊國安，下個月就調去做核電，再下年調去搞兩岸政策，玩咩？咁樣係亂點鴛鴦譜，畀人鬧到飛起啦。
冇制度下，一個政治任命就會係政治元首的政治酬庸，對市民來講就係惡夢。唔係因為政府冇錢，而係政治任命之官員，社會係希望佢上任之後，即刻做嘢有貨交，唔係要佢上任去學嘢。要學政治，香港有好多渠道，選舉又得，搞NGO又得，去搞智庫又得，議員助理又得，點解政府要畀十幾二十皮一個月一條友去學嘢呢？先唔講香港政治領袖學歷視野不足，單係公共行政能力的嚴重倒退及滯後，一樣令人擔心。