梁植穎老師
(左起)黎潔廉、林文瀚、陳家強、單周堯教授，一同在台上分享昔日在母校點滴。
英皇書院的紅磚建築校舍為法定古蹟。
老牌名校英皇書院慶祝創校92年，1926年係創校之年，卻有人細心考證該校歷史遠遠多於92年。於該校任教年資最長、逾31年嘅前副校長梁植穎老師，經過仔細考證後，證實書院應有160年歷史，可追溯至1857年創立嘅「官立西角義學」開始，後來改名為「西營盤書院」，到最後命名為「英皇書院」，連香港歷史博物館前館長丁新豹都確認呢個講法；仲唔止，昨日新書《官立英皇書院創校160周年紀念文獻圖片集》發布會上，一班資深校友包括政府現任及前任官員及法官等都出面力撐。
校友返到母校，少不免想當年，包括高等法院上訴庭副庭長林文瀚法官、財經事務及庫務局前局長陳家強、衛生署副署長黎潔廉及香港能仁專上學院副校長單周堯教授。其中陳家強就話其實佢嘅英皇歲月只有1年，因為當年聖若瑟無預科讀，於是同成班書友仔去咗英皇，諗住呢度近港大，點知後來反而去咗美國升學。
至於法官林文瀚就自爆好百厭，佢話當年與同學仔試過將粉刷沾滿白粉，然後放喺門頂，等老師走入嚟時就灑到滿身都係粉。Ray聽到呢種整蠱老師方法，感覺真係好「那些年」。
另外，英皇亦試過預科收女生。70年代成為男校女生嘅黎潔廉回憶當年面試時，被校長問對學校有咩contribution？佢話當時諗：我嚟讀書咋喎，點解要貢獻？至於點答呢已經唔記得，只好引用校歌嘅最後一句：「Glory to our school」。