土下座作為老一代嘅Gamer，當然都有經歷過當年《仙劍奇俠傳》嘅輝煌，作為史上最成功嘅台灣國產RPG，「仙劍」一直係唔少人心目中嘅神作。今個星期又一款《仙劍奇俠傳》嘅手遊推出市場，名為《仙劍奇俠傳：宿命》，連廣告都係主打還原當年劇情，玩家操控主角李逍遙再次經歷佢不平凡嘅人生，不過雖然劇情開始時同以往一樣，但之後嘅劇情細節就大有分別，而玩法亦係最「流行」嘅大陸式MMORPG，自動導航、掛機、大量小任務等等，你估到會有嘅元素全部都有，只係換咗「仙劍」塊皮。其實自從《仙劍》踏入網絡時代後，喺唔同平台嘅衍生作品已經超過30套，連手機遊戲都有唔少，就算幾精彩嘅故事相信大家都有厭倦嘅一日，最慘係呢堆衍生作水準往往參差不齊，對老玩家嚟講，好難有咩再感動一次嘅體驗，新玩家亦唔會因為呢啲課金手遊而覺得「仙劍」有咩咁特別。講到呢度，到底《仙劍奇俠傳：宿命》好唔好玩相信大家應該睇得明，講到底不斷消耗IP嘅價值都唔係好事。
日報