除咗上次提過的《新夢境連結R》，其實仲有另一隻話題性同樣高嘅新作《解神者》上架。《解神者》嘅話題性並唔係因為遊戲本身有咩黑幕，而係比較集中於ACG圈。先講遊戲本身水平相當之高，著名聲優、高質美術呢啲A級作品要有嘅都有，玩法亦十分有趣，利用本身係動作遊戲嘅優點，將重複打副本嘅流程變成roguelike玩法，每局10至20分鐘，重複刷關卡都可以有唔同嘅趣味。
至於話題性，簡單嚟講，喺遊戲未正式上架前嘅公測，有大量玩家對遊戲劇情非常不滿，原因係設定上玩家只算係類似「靈魂」嘅存在，需要連結去唔同「神格」身上先可以活動，故此遊戲入面佔90%嘅女性角色，都只當主角係工具人。呢類稱為「虐待單身狗」嘅設定令大量玩家不滿，最終令開發商公開道歉，唔止炒咗文案，更重新更改遊戲文本及設定，玩家(男主角)亦終於有返「人樣」。今時今日因為有網絡平台，玩家嘅意見可以好直接傳遞俾遊戲廠商，有人覺得係好事，因為至少廠商知道玩家要咩；但有人亦覺得如所有創作都由玩家嘅聲音決定，慢慢就會失去創意，唔知大家又點睇呢？