又一隻舊時代遊戲宣布推出中文版，睇標題就知今次係《夢幻模擬戰I&II》。講真，就同之前講手機版一樣，呢隻遊戲當時只算係小眾fans所知道嘅名作，遊戲水準非常高(特別第2集)，今次復刻響PS4同Switch仲有中文版，本身土下座都有啲期待，但睇真，今次有個最大問題，估計係版權問題，人設唔再用原本嘅漆原智志，而改用名不經傳嘅畫師凪良。聽落問題不大嘅改動，分分鐘成為致命傷，皆因當年遊戲可以爆紅，最大功勞都係負責人物設計嘅漆原智志，呢位大師作品唔多，但全部都係經典傑作，佢嘅唯美風格多年嚟都未有人可以超越，絕對係呢隻遊戲最大賣點。諷刺在《夢幻模擬戰》令漆原智志廣受注目，多年後又因為冇咗漆原智志而令《夢幻模擬戰》好似失去靈魂。呢件事都證明一隻遊戲好壞真係要睇好多方面，今次復刻會唔會受歡迎未知，但今年內就會推出，到時大家不妨留意下。