唔經唔覺《超級機器人大戰DD》已經推出，呢隻雖然唔係第一隻「機戰」題材手遊，但就係第一隻用返戰棋SLG玩法，由於有《夢幻模擬戰》成功打出一條生路，證明SLG手遊都可以好高質同值得玩，所以包括土下座在內唔少老玩家都有期待。先講好嘅，隻game嘅玩法的確有原作味，畫面亦非常出色，收錄嘅作品亦算豐富，除咗高達同萬能俠等台柱，仲有《惡魔人》、《鐵血的孤兒》及《新世紀福音戰士》等，加埋全中文劇情同時分台灣與香港譯名，都係抵讚之處。BUT！手機平台都唔會預佢冇課金元素，只不過《機戰DD》嘅課金位就擺咗響機體嘅技能到，每款機體只係得兩招，想換技就要抽到相應技能，另外每場戰鬥竟然最多都只係出到4部機體，竟然比起《夢幻模擬戰》更少，兩者加埋好明顯就係力強者勝，話有戰略性都似乎說不過去，暫時都好難睇到會大熱，不過講真，手遊平台唔一定係有質素嘅遊戲就會跑得出，即管睇下隻game未來會點發展。