發生500人情不要來後，立即問去年才結婚的表妹擺酒有沒有蝕，「蝕咗幾千蚊啦！」幾K對她來說只是小菜一碟，可她補充：「埋數嗰時見到兩封$300，嗰兩位仲係有嚟食嘅，真係會好記得。」她在五星級酒店設宴，按婚事顧問開出的$1,000公價，單是這兩位$300朋友，已要新人補貼$1,400，佔蝕了的幾K中的一大部分。
無論是問的我還是答的她，都用了「蝕」字。蝕？又不是民建聯為籌款搞宴會（還有CY唱歌贈興，真係天籟），只有把擺酒視為一盤生意，才會想到賺和蝕。這，就是香港的核心價值。
就是500人情不要來發生的那天，同文月巴氏向朋友們查詢即日的人情公價匯率，原來當晚有位認識了廿年的老死擺酒，但他有工作在身或者不能出席。我說：「做夠$1,000啦！識咗廿年，除番開都只係$50一年啫！」結果他真的去不了，做了$800人情。除番開，都只係$40一年啫！
買了機票但公司臨時爆屎渠飛不了，我們會罵航空公司的non-refundable政策不仁；買了concert飛但臨時出了trip，我們會在FB轉讓給朋友的朋友。唯獨去唔到飲，卻會乖乖地照做人情。人唔到禮都到，就是香港的核心價值。
幾年前為朋友做兄弟兼幫手影下相，我做了公價人情，他回了公價利是，全日冇乜點食嘢，影咗二千幾張相。而我玩得好開心。
這，就是做朋友的核心價值。
當新人問：「搞錯呀要我倒貼你三嚿水嚟飲我嗰餐？」時，請提防客人還擊：「喺茶記擺，一人一碟火腩飯一支青島咪實賺囉。」
全港最憎旅行的Ex旅遊記者，對飲食最沒要求的飲食專欄撰稿員，請同時關注《新假期》周刊每期連載的「飲食字典」。